একক প্ৰচেষ্টাত সেউজ বিপ্লৱৰ সূচনা কৰা খেতিয়কজন

নৰ্থ ইষ্ট হিৰো স্বীকৃতিপ্ৰাপ্ত লীলা হাজৰিকাক দিল্লীস্থিত ইন্দিৰা গান্ধী মৈদামত মুখ্যমন্ত্ৰী সৰ্বানন্দ সোণোৱাল আৰু হিমন্ত বিশ্ব শৰ্মাই নিজ হাতৰে প্ৰদান কৰিছিল অৰুণোদয় বটাঁ ৷ ২০১৬ বৰ্ষত তেখেত জন্ম দিয়ে 'সালোক্য সেৱা কানন' নামৰ এক বেচৰকাৰী সংস্থাৰ

লখিমপুৰ, 30 ছেপ্টেম্বৰঃ লখিমপুৰ জিলাৰ অসম অৰুণাচল সীমান্তৱৰ্তী এজন লোক ৷ নাম লীলা হাজৰিকা ৷ এটি সেউজীয়া মনেৰে ২৫ বছৰৰ পূৰ্বে বানে গৰকা দোৰপাঙৰ পাৰত তেখেতে আৰম্ভ কৰিছিল সেউজ বিপ্লৱৰ ৷ প্ৰথমে একক প্ৰচেষ্টাতে চলাই গৈছিল সেউজ বিপ্লৱ ৷ পৰৱৰ্তী সময়ত ২০১৬ বৰ্ষত তেখেত জন্ম দিয়ে 'সালোক্য সেৱা কানন' নামৰ এক বেচৰকাৰী সংস্থাৰ ৷ মুঠ ৯ জন সদস্যৰে গঠিত সালোক্য সেৱা কাননৰ জৰিয়তে হাজৰিকাই সকলো বিদ্যালয়-মহাবিদ্যালয়, অনুষ্ঠান-প্ৰতিষ্ঠান, ব্যক্তিগত-ৰাজহুৱা স্থানত বৃক্ষৰোপন কৰি সকলোকে বৃক্ষৰোপন কৰিবলৈ আহ্বান জনাই আহিছে ৷

নৰ্থ ইষ্ট হিৰো স্বীকৃতিপ্ৰাপ্ত লীলা হাজৰিকাক দিল্লীস্থিত ইন্দিৰা গান্ধী মৈদামত মুখ্যমন্ত্ৰী সৰ্বানন্দ সোণোৱাল আৰু হিমন্ত বিশ্ব শৰ্মাই নিজ হাতৰে প্ৰদান কৰিছিল অৰুণোদয় বটাঁ ৷ যি সময়ত ৰাজ্য খনৰ চুকে-কোনে গঢ়ি উঠিছে বিষাক্ত ৰাসায়নিক সাৰ প্ৰয়োগ কৰা বৃহৎ সংখ্যক কৃষিফাৰ্ম, সেই সময়তে বৃক্ষবন্ধু লীলা হাজৰিকাই নিজা বাৰীত ব্যতিক্ৰমী পদক্ষেপেৰে আৰম্ভ কৰিছে এখন কৃষিফাৰ্ম ৷ শ্ৰমৰ বিনিময়ত গঢ়ি উঠা কৃষি ফাৰ্মখনৰ জৰিয়তে তেখেতে বৃহত্তৰ অঞ্চলটোৰ কৃষক ৰাইজক ৰাসায়নিক সাৰ প্ৰয়োগেৰে কৰা কৃষি মানুহৰ দেহৰ বাবে কিমান বিপজ্জনক তাৰ সম্পৰ্কত সজাগতা সৃষ্টি কৰি আহিছে ৷

আনহাতে বাৰীখনত বিভিন্ন ৰবি শস্যৰ উপৰিও পান-তামোল, নাৰিকলৰ লগতে অমিতা খেতিও কৰিছে কৃষক গৰাকীয়ে ৷ দৰিদ্ৰ কৃষক গৰাকীয়ে পোক-পতংগ নিৰ্মূলৰ বাবে বাৰিখনৰ চাৰিওফালে ৰোপণ কৰিছে নিম গছ ৷ কিন্তু নিজৰ শ্ৰমৰ বিনিময়ত সেউজ বিপ্লৱৰ সূচনা কৰা কৃষক লীলা গগৈয়ে এই পৰ্যন্ত লাব কৰা নাই কোনোধৰণৰ চৰকাৰী সাহায্য ৷