লখিমপুৰ,২ ফেব্ৰুৱাৰী : অসমৰ মুখ্যমন্ত্ৰীৰ পৰিয়ালৰ ভূমি কেলেংকাৰীক লৈ (CM family land grabbing case) ৰাজ্যত প্ৰতিবাদ অব্যাহত আছে । পুনৰ মুখ্যমন্ত্ৰী আৰু তেওঁৰ পৰিয়ালৰ বিৰুদ্ধে তীব্ৰ প্ৰতিবাদ সাব্যস্ত কৰিব কংগ্ৰেছে । লখিমপুৰত মঙলবাৰে প্ৰদেশ কংগ্ৰেছে মুখ্যমন্ত্ৰীৰ জন্মদিনৰ দিনাই তীব্ৰ ক্ষোভ প্ৰকাশ কৰে । মুখ্যমন্ত্ৰীগৰাকীক কেলেংকাৰীৰ মহানায়কৰ আখ্যা দিলে কংগ্ৰেছে ।
কংগ্ৰেছ নেতা অজয় ফুকন, স্বপন মণ্ডলকে ধৰি বহু নেতা-কৰ্মীয়ে এক সংবাদমেল সম্বোধন কৰে (Lakhimpur congress press meet against CM)। মুখ্যমন্ত্ৰী আৰু তেওঁৰ পৰিয়ালৰ বিৰুদ্ধে বিভিন্ন ধৰণৰ অভিযোগ উত্থাপন কৰাৰ লগতে সমগ্ৰ ঘটনাৰ উচিত তদন্তৰ দাবী কৰে কংগ্ৰেছ নেতাসকলে । উচ্চ ন্যায়ালয়ৰ এগৰাকী ন্যায়াধীশৰ দ্বাৰা সমগ্ৰ ঘটনা তদন্ত হোৱাটো বিচাৰে প্ৰদেশ কংগ্ৰেছে ।
তদন্ত নোহোৱা পৰ্যন্ত কংগ্রেছ দলে আন্দোলন অব্যাহত ৰাখিব বুলিও স্পষ্ট কৰি দিয়ে । কংগ্ৰেছ দলে প্ৰতিবাদ দিল্লীলৈও প্ৰসাৰিত কৰাৰ সিদ্ধান্ত গ্ৰহণৰ কথা সদৰি কৰে কংগ্রেছৰ নেতাসকলে । অহা ৩ ফেব্ৰুৱাৰীত লখিমপুৰত কংগ্রেছৰ উদ্যোগত এক বিশাল প্ৰতিবাদী কাৰ্য্যসূচী ৰূপায়ণ কৰা হ'ব বুলিও তেওঁলোকে উল্লেখ কৰে ।
জিলা কংগ্রেছৰ কাৰ্যালয়ত আয়োজিত এক সংবাদ মেলত তেওঁলোকে এই কথা সদৰি কৰে । সংবাদমেলত জিলা কংগ্রেছৰ সভাপতি প্ৰদীপ গগৈকে ধৰি প্ৰশান্ত গগৈ, গংগাজ্যোতি টায়েগাম, হাফিজা বেগম আদি কংগ্রেছৰ নেতা-কৰ্মীয়েও অংশ গ্ৰহণ কৰে ।
লগতে পঢ়ক :ওপজা দিনৰ আনন্দ : মাজুলীৰ শিশুৰে আজি মুখ্যমন্ত্ৰীৰ নৈশভোজন
