কোকৰাঝাৰ,9 ফেব্ৰুৱাৰী:- বিটিআৰৰ কৃষি বিভাগে সোমবাৰে কোকৰাঝাৰ জিলাৰ সাত গৰাকী হিতাধিকাৰীৰ মাজত বিতৰণ কৰিলে ট্ৰেক্টৰ ৷ কোকৰাঝাৰ চহৰত থকা জিলা কৃষি বিষয়াৰ কাৰ্যালয় প্ৰাংগনত আয়োজিত এক অনুষ্ঠানত এই ট্ৰেক্টৰ সমূহ বিতৰণ কৰা হয় ৷ মুখ্যমন্ত্ৰীৰ সমগ্ৰ গ্ৰাম্য উন্নয়ন যোজনাৰ অধীনত হিতাধিকাৰীৰ মাজত ট্ৰেক্টৰ সমূহ বিতৰণ কৰে বিটিআৰৰ কৃষি বিভাগৰ কাৰ্যবাহী সদস্য ঘনশ্যাম দাসে ৷
ইপিনে ট্ৰেক্টৰ বিতৰণৰ পিচত কাৰ্যবাহী সদস্য ঘনশ্যাম দাসে চৰকাৰে প্ৰদান কৰা ট্ৰেক্টৰ সমূহ কৃষি কাৰ্যত সঠিকভাৱে ব্যৱহাৰ কৰিবলৈ আহ্বান জনায় ৷ কাৰ্যবাহী সদস্য দাসে পূৰ্বৰ চৰকাৰৰ আমোলত প্ৰদান কৰা ট্ৰেক্টৰ সমূহ এতিয়া হিতাধিকাৰীৰ ঘৰত বিচাৰি গলেও দেখিবলৈ পোৱা নাযাব বুলি উল্লেখ কৰি গভীৰ উদ্বেগ প্ৰকাশ কৰে ৷ লগতে ঘনশ্যাম দাসে কৃষি কাৰ্যৰ বাবে চৰকাৰে আঁচনি যোগে প্ৰদান কৰা ট্ৰেক্টৰ সমূহ কৃষি উৎপাদনত ব্যৱহাৰ কৰিবলৈ আহ্বান জনায় ৷
একেদৰে চৰকাৰীভাবে বিতৰণ কৰা ট্ৰেক্টৰক অইন কামত খটুওৱা বা লীজত নিদিবলৈ কঠোৰ বাৰ্তা দিয়াৰ লগতে নীতি-নিৰ্দেশনা নমনা সকলৰ বিৰুদ্ধে বিহিত ব্যৱস্থা গ্ৰহণ কৰা হ’ব বুলি সকিয়নী প্ৰদান কৰে বিটিআৰৰ কৃষি বিভাগৰ কাৰ্যবাহী সদস্য ঘনশ্যাম দাসে ৷
লগতে পঢ়কঃ নগাঁৱত ধূলিৰ বিৰুদ্ধে পথ অৱৰোধ কৰি ছাত্ৰ-ছাত্ৰীৰ উত্তাল প্ৰতিবাদ
