ডিফু,১৩ মাৰ্চ: বিগত তিনিমাহে সন্ধান নাই বাহন সহিতে এগৰাকী গাড়ীচালকৰ ৷ সমগ্ৰ ঘটনা সৰ্ন্দভত শনিবাৰে ডিফুৰ এটি অসহায় পৰিয়াল সংবাদ মাধ্যমৰ কাষ চাপে ৷ দেওবাৰে ডিফুস্থিত জিলা প্ৰেছ ক্লাবত অনুষ্ঠিত এক সংবাদমেলত শোকত ভাগি পৰে অপহৃত ব্যক্তিগৰাকীৰ পৰিয়াল ৷ অপহৃতৰ পিতৃ আব্দুল মতলিবে সংবাদ মাধ্যমৰ আগত সদৰী কৰা অনুসৰি, পুত্ৰ আফজল আলীয়ে বিগত ৩ জানুৱাৰীত ভাড়া লৈ নিজৰ বগা ৰঙৰ এএছ ০২ চি চি ২৬০৪ নম্বৰৰ টাটা ম’বাইল বাহনখনেৰে হোজাইৰ যমুনামুখলৈ গৈছিল ৷ পৰৱৰ্তী সময়ত আন এটা ভাড়ালৈ নগাঁৱলৈ যোৱা বুলি পৰিয়ালৰ লোকক জনাইছিল ৷ তাৰপিছৰ পৰা পুত্ৰৰ সৈতে যোগাযোগ বিচ্ছিন্ন হয় পিতৃৰ ।
এই সন্দৰ্ভত পিতৃ মতলিব আলীয়ে ডিফু থানাৰ দ্বাৰস্থ হৈছিল ৷ কিন্তু ঘটনাৰ স্থান নগাঁও হোৱাৰ বাবে এই সন্দৰ্ভত চলিত বছৰৰ ৬ জানুৱাৰীত নগাঁও সদৰ থানাত ৪৪/২০২১ ত গোচৰ ৰুজু কৰি তদন্তৰ বাবে হয়বৰগাঁও আৰক্ষী চকীলৈ গোচৰটো হস্তান্তৰ কৰে ।
পিতৃ আব্দুল মতলিবে অভিযোগ কৰা অনুসৰী, হয়বৰগাওঁ আৰক্ষী চকীৰ ভাৰপ্ৰাপ্ত বিষয়া আবিদুৰ ৰহমানে কোনো তদন্ত নকৰাকৈ গোচৰটো পেলাই থৈ ওলোটাই অপহৃতৰ পিতৃকহে তদন্ত কৰিবলৈ কয় । যোৱা ৪ ফেব্ৰুৱাৰীত নগাঁও আৰক্ষীয়ে ধিঙৰ কদমনিৰ পৰা গোচৰ সংক্ৰান্তত এজন ব্যক্তিক আটক কৰি জেল হাজোতলৈ প্ৰেৰণ কৰে যদিও মূল অপৰাধীক কৰায়ত্ত কৰিবলৈ আজিও সক্ষম হোৱা নাই ৷ তদুপৰি বাহনসহ সন্ধানহীন আফজল আলীৰো কোনো শুংসূত্ৰ উলিয়াব নোৱাৰাৰ বাবে আৰক্ষীৰ ব্যৰ্থতাক লৈ প্ৰচণ্ড ক্ষোভ উজাৰে আফজলৰ পিতৃয়ে ৷
এই সন্দৰ্ভত পিতৃয়ে নগাঁও আৰক্ষী অধীক্ষৰ কাৰ্যালয়তো ক্ষীপ্ৰ আৰু উচিত তদন্তৰ বাবে দাবী জনায় । এই লৈ নগাঁও জিলাৰ অতিৰিক্ত আৰক্ষী অধীক্ষকে গোচৰটোৰ তদন্ত কৰাৰ আশ্বাস প্ৰদান কৰে ৷ ইয়াৰ পিছতো কিন্তু বৰ্তমানলৈ কোনো শুংসূত্ৰ নোলাল অপহৃত চালক কিম্বা বাহনৰ ৷ ফলত শোকত ভাগি পৰিছে আফজলৰ পৰিয়াল ৷
লগতে পঢ়কঃ শিৱসাগৰত উপস্থিত বিজেপি নেত্ৰী স্মৃতি ইৰাণী
