গভীৰ অৰণ্যত গুলীবিদ্ধ বন্যহস্তীক প্ৰাথমিক চিকিৎসা প্ৰদান বনবিভাগৰ

অৱশেষত ধনশিৰি, দলদলী সংৰক্ষিত বনাঞ্চলৰ অন্তৰ্গত মিচিবাইলামৰ গভীৰ এলেকাত মঙলবাৰে গুলীবিদ্ধ হোৱা বন্যহস্তী এটা উদ্ধাৰ কৰে বনবিভাগে ৷ উদ্ধাৰৰ অন্তত হাতীটোক চিকিৎসা প্ৰদান কৰা হয়,হাতীটোক কোনো দুৰ্বৃত্তই দেশীয়ভাৱে নিৰ্মিত বন্দুকেৰে গুলীয়াই আগফালৰ সোঁভৰিত আঘাত কৰে

ডিফু, ৫ ডিচেম্বৰ: অৱশেষত ধনশিৰি, দলদলী সংৰক্ষিত বনাঞ্চলৰ অন্তৰ্গত মিচিবাইলামৰ গভীৰ এলেকাত মঙলবাৰে গুলীবিদ্ধ হোৱা বন্যহস্তী এটা উদ্ধাৰ কৰে বনবিভাগে ৷ উদ্ধাৰৰ অন্তত হাতীটোক চিকিৎসা প্ৰদান কৰা হয় ৷ প্ৰাপ্ত খবৰ অনুসৰি, বুধবাৰে ধনশিৰি থানাৰ দলদলী সংৰক্ষিত বনাঞ্চলৰ এলেকাধীন তুলাৰাম আৰু মিচিবাইলামৰ হাবিত বনবিভাগে এটি গুলীবিদ্ধ বন্যহস্তী প্ৰত্যক্ষ কৰে ৷ বন্যহস্তীটো নাগালেণ্ডৰ ইটাংগী বনাঞ্চলৰ পৰা ওলাই অহা বুলি বনবিভাগৰ লোকে সন্দেহ কৰিছে ৷ বনবিভাগৰ দলে বেটেলিয়নৰ দলৰ সহযোগত কাজিৰঙাৰ পৰা অহা চিকিৎসকৰ দল এটাক লগত লৈ হাবিত প্ৰৱেশ কৰে যদিও পৰ্যাপ্ত পোহৰৰ অভাৱত হাতীটোক চিকিৎসা প্ৰদানত ব্যৰ্থ হয় ৷ বৃহস্পতিবাৰে পুৱা বনবিষয়া ধনীৰাম ৰংপিৰ নেতৃত্বত বনবিভাগৰ ৰাঙাপাহাৰ ডিভিজনৰ কাৰ্বি আংলং কনাজাৰভেচন ভলণ্টিয়েৰৰ এক অভিযানকাৰী দলে অভিযান চলাই বন্যহস্তীটোক বিচাৰি উলিওৱাৰ পিছত ট্ৰেংকুলাইজ কৰি হাতীটোৰ আঘাতপ্ৰাপ্ত ভৰিত প্ৰাথমিক চিকিৎসা আগবঢ়ায় ৷ বন্যহস্তীটোক চিকিৎসা আগবঢ়োৱা চিকিৎসক প্ৰাণজিৎ বসুমতাৰীয়ে সাংবাদিকৰ আগত কয় যে, হাতীটোক কোনো দুৰ্বৃত্তই দেশীয়ভাৱে নিৰ্মিত বন্দুকেৰে গুলীয়াই আগফালৰ সোঁভৰিত আঘাত কৰে ৷ হাতীটোক সাময়িকভাৱে প্ৰাথমিক চিকিৎসা আগবঢ়োৱা হৈছে যদিও পিছলৈ অস্ত্ৰোপচাৰ কৰিবলগীয়া হোৱাৰ আশংকা ব্যক্ত কৰে চিকিৎসক গৰাকীয়ে ৷

লগতে চাওকঃমধ্যভোগীৰ চৰম প্ৰতাৰণাৰ বলি কৃষক : পাচলিৰ উচিত মূল্য নাপায় বিপদত ৰাজ্যৰ কৃষক