ডিফু, 5 আগষ্ট : ক'ভিড পৰিস্থিতি নিয়ন্ত্ৰণৰ বাবে ৰাজ্য চৰকাৰে জাৰি কৰা ক'ভিড নীতি তথা আংশিক লক ডাউনৰ সুযোগ গ্ৰহণ কৰি ৰাজ্যত সক্ৰিয় হৈছে একাংশ নিচাজাতীয় সামগ্ৰী সৰবৰাহকাৰী চক্ৰ ৷ ড্ৰাগছ তথা অন্যান্য নিচাজাতীয় সামগ্ৰী সৰবৰাহৰ বাবে অসম আৰক্ষীয়ে অব্যাহত ৰখা তীব্ৰ অভিযানৰ পাছতো গোপনে ব্যৱসায় চলাই গৈছে এইসমূহ চক্ৰই ৷
ইয়াৰ মাজতে বৃহস্পতিবাৰে দুপৰীয়া কাৰ্বি আংলং জিলাৰ বোকাজান আৰক্ষীৰ অভিযানত জালত পৰিছে এজন যুৱক ৷ আৰক্ষীৰ বিশেষ তালাচীত বুজন পৰিমাণৰ নিষিদ্ধ হেৰ'ইন আৰু নগদ ধনসহ আৰক্ষীৰ জালত পৰিছে যুৱকজন ৷ প্ৰাপ্ত তথ্য মতে, গোপন সূত্ৰৰ তথ্যৰ ভিত্তিত বৃহস্পতিবাৰে দিনৰ প্ৰায় 1 বজাত আৰক্ষীৰ এটা দলে বোকাজান থানাৰ অন্তৰ্গত ইকৰাণীৰ মিথিলেশ গুপ্তা নামৰ যুৱকজনৰ ঘৰত তালাচী চলায় ৷
উক্ত তালাচীৰ সময়ত অভিযানকাৰী আৰক্ষীৰ দলটোৱে দুটা চাবোনৰ বাকচত ভৰাই থোৱা অৱস্থাত 18 গ্ৰাম হেৰ'ইন জব্দ কৰিবলৈ সক্ষম হয় ৷ জব্দ হোৱা হেৰ'ইনখিনি মিথিলেশ গুপ্তাৰ AS-০৯-AC-৯৫৭৯ নম্বৰৰ অট’ৰিক্সাখনৰ পিছফালে লুকুৱাই ৰখা হৈছিল ৷ জব্দ কৃত হেৰইন খিনিৰ মূল্য প্ৰায় ডেৰ লক্ষাধিক টকা হ'ব বুলি প্ৰকাশ কৰিছে আৰক্ষীয়ে ৷
লগতে অভিযানকাৰী আৰক্ষীৰ দলটোৱে লগতে যুৱকজনৰ বাসগৃহৰ পৰা নগদ 1,78,000 টকাও উদ্ধাৰ কৰে ৷ বোকাজান থানাৰ ভাৰপ্ৰাপ্ত বিষয়া মণি চমুৱা, উপ পৰিদৰ্শক হাওকাম চাংচন, সহকাৰী উপ পৰিদৰ্শক ৰাজীৱ আহমেদৰ নেতৃত্বত চলিছিল এই অভিযান ৷ আৰক্ষীয়ে ইতিমধ্যে মিথিলেশ গুপ্তাকো গ্ৰেপ্তাৰ কৰি অধিক তথ্যৰ বাবে জেৰা অব্যাহত ৰাখিছে ৷
উল্লেখ্য যে, মুখ্যমন্ত্ৰীৰ কঠোৰ নিৰ্দেশৰ পাছতে ৰাজ্যজুৰি ড্ৰাগছ বিৰোধী অভিযান অব্যাহত ৰাখিছে আৰক্ষীয়ে ৷ ইয়াৰ পাছতো বহু ঠাইত হৈ আছে ড্ৰাগছ তথা অন্যান্য নিচাজাতীয় সামগ্ৰীৰ অবৈধ বেহা ৷
লগতে পঢ়কঃ আন্দোলন নহয়, কৃষি বিপ্লৱেৰে উজ্বলিছে টিংখাঙৰ মহিলা
