ব্যুৰ' ৰিপৰ্ট, 23 অক্টোবৰঃ অৱশেষত যেন গা লৰিল পৰিবহন বিভাগৰ ৷ মঙলবাৰে নিশা হঠাৎ দক্ষিণ কামৰূপৰ ভিন্ন ঠাইত অভিযান চলিল পৰিবহন বিভাগৰ । কি ট্ৰাক, কি বাইক, কি চাৰিচকীয়া বাহন, যান-বাহন আইন অমান্য কৰা সকলো লোককে পৰিবহন বিভাগে বিহিলে জৰিমনা । হাৰি নগল আৰক্ষীও ৷ হেলমেট পৰিধান নকৰাকৈ বাইক চলাই যান-বাহন আইন নমনাৰ বাবে পৰিবহন বিষয়াই জৰিমনা বিহিলে আৰক্ষীক । ইপিনে যোৱা ৩ টা দিনত দক্ষিণ কামৰূপৰ বিভিন্ন স্থানত ট্ৰাক-ডাম্পাৰৰ দৌৰাত্মৰ ফলত ১০ জনকৈ লোকে প্ৰাণ হেৰুৱাইছিল । যাৰ বাবে পৰিবহন বিভাগে হঠাৎ অভিযান চলাই মঙলবাৰে নিশা দক্ষিণ কামৰূপৰ বকো, ছয়গাও, মিৰ্জা, কুলশী, লোহাৰঘাট আদিত অভিযান চলাই বিভিন্ন অঞ্চলত শতাধিক চালানবিহীন বালিৰ ট্ৰাক-ডাম্পাৰ জব্দ কৰে ৷
বিশেষকৈ কুলশী অঞ্চলত ৫০ খনৰো অধিক চালানবিহীন বালি কঢ়িওৱা ট্ৰাক জব্দ কৰাৰ লগতে ছয়গাঁও কুকুৰমাৰা ওচৰৰ বৰতেজপুৰত ২০ খনৰো অধিক গাড়ী জব্দ কৰে ৷ আনহাতে বকোতো অতিৰিক্ত জিলা উপায়ুক্ত, চক্ৰ বিষয়াৰ উপস্থিতিত বহুকেইখন গাড়ী জব্দ কৰে পৰিবহন বিভাগে । লগতে ছয়গাঁও কুকুৰমাৰাত AS-01-CC-2611 নম্বৰৰ দুখন একে নম্বৰৰ গাড়ী জব্দ কৰে ৷ এই অভিযানত স্বয়ং কামৰূপ জিলা উপায়ুক্ত কমল কুমাৰ বৈশ্যৰ লগতে অতিৰিক্ত আৰক্ষী অধীক্ষককে ধৰি যান-বাহন নিয়ন্ত্ৰণ শাখাৰ লগতে আৰক্ষী আৰু চক্ৰ বিষয়াই অংশগ্ৰহণ কৰে ৷
