গুৱাহাটী, 23 মাৰ্চ : মঙলবাৰে সমগ্ৰ অসমতে শুভাৰম্ভ কৰা হয় ভাৰতীয় প্ৰাথমিক চিকিৎসা পৰিষদৰ এক বিশেষ পাঠ্যক্ৰম (Special course for Indian First Aid Specialist in Assam) ৷ ভাৰতৰ প্ৰাক্তন প্ৰধানমন্ত্ৰী অটল বিহাৰী বাজপেয়ীৰ দিনৰে পৰা চলি অহা আৰু মোডী চৰকাৰৰ দিনত আৰম্ভ হোৱা আত্মনিৰ্ভৰশীল ভাৰতৰ লগতে সংগতি ৰাখি এই বিশেষ পাঠ্যক্ৰমটো যুগুত কৰি উলিওৱা হৈছে ৷ যিকোনো বিভাগতে উচ্চতৰ মাধ্যমিক পৰীক্ষাত উত্তীৰ্ণ শিক্ষাৰ্থীসকলে গ্ৰহণ কৰিব পাৰিব এই পাঠ্যক্ৰম ৷
মঙলবাৰে গুৱাহাটী প্ৰেছ ক্লাৱত আয়োজিত এক সংবাদমেলৰ জৰিয়তে এই কথা সদৰি কৰে ভাৰতীয় প্ৰাথমিক চিকিৎসা পৰিষদৰ ৰাষ্ট্ৰীয় সমন্বয়ক ড৹ তপন কুমাৰ ভৰালীয়ে ৷ গুৱাহাটী প্ৰেছ ক্লাৱত সংবাদমেল সম্বোধন কৰি ড৹ ভৰালীয়ে কয় যে, ভাৰত চৰকাৰৰ স্বীকৃতিপ্ৰাপ্ত ভাৰতীয় প্ৰাথমিক চিকিৎসা বিশেষজ্ঞ শীৰ্ষক এই পাঠ্যক্ৰমত উচ্চতৰ মাধ্যমিক উত্তীৰ্ণ কলা, বিজ্ঞান, বাণিজ্য যিকোনো শাখাৰ ছাত্ৰ-ছাত্ৰী, যুৱক-যুৱতীয়ে নাম ভৰ্তি কৰিব পাৰিব । এই পাঠ্যক্ৰম এবছৰীয়া । পাঠ্যক্ৰম সমাপ্তিৰ পাচত বিশ্ববিদ্যালয়ৰ অধীনত ডিপ্লমা প্ৰদান কৰা হ’ব (Special course for Indian First Aid Specialist)।
লগতে তেওঁ কয় যে, ৰাজ্যৰ প্ৰতিখন জিলাতে এই পাঠ্যক্ৰম উপলব্ধ হ’ব । প্ৰাথমিক চিকিৎসা বিশেষজ্ঞ পাঠ্যক্ৰমৰ বাবে আগ্ৰহী সকলে ৯৮৬৪০৯৪১৯০, ৮৪৭১৮২৮৮৮১ নম্বৰত যোগাযোগ কৰিব পাৰিব । উল্লেখ্য যে, সংবাদমেলত ভাৰতীয় প্ৰাথমিক চিকিৎসা পৰিষদৰ অধ্যক্ষ চাবাব আলমো উপস্থিত থাকে ।
লগতে পঢ়ক : মাজুলীৰ চৰকাৰী কাৰ্যালয়ৰ পৰা চুৰি প্ৰায় ৬০০ টা জিঅ' বেগ
