গুৱাহাটী,২৬ জুলাই: মহানগৰীত পুনৰ চাঞ্চল্যকৰ ঘটনা ৷ কুলাংগাৰ পুত্ৰৰ অত্যাচৰ সহিব নোৱাৰি ঘৰ-বাৰী এৰিলে বৃদ্ধ পিতৃ-মাতৃয়ে ৷ আনকি ঘৰ এৰি বৃদ্ধাশ্ৰমত থকা পিতৃ-মাতৃকো আক্ৰমণৰ চেষ্টা কুলাংগাৰ পুত্ৰৰ ৷ সম্পত্তিৰ বাবে পিতৃ-মাতৃক নিৰ্মম অত্যাৰ চলোৱাৰ অভিযোগ উত্থাপন হৈছে অৰূপ কুমাৰ কলিতা নামৰ ব্যক্তিজনৰ বিৰুদ্ধে ৷ মঙলবাৰে নিশা হাতীগাঁৱস্থিত চিনিয়ৰ চিটিজেন হোম নামৰ বৃদ্ধাশ্ৰমত অৰূপ কুমাৰ কলিতাই পিতৃ-মাতৃক আক্ৰমণৰ চেষ্টা চলাই ৷ যাৰ বাবে কুলাংগাৰ পুত্ৰ অৰূপ কুমাৰ কলিতাৰ বিৰুদ্ধে গোচৰ দিবলৈ নিশাই হাতীগাঁও থানাত উপস্থিত হয় বৃদ্ধ পিতৃ-মাতৃ ।
দুৰ্ভগীয়া পিতৃ-মাতৃয়ে পুত্ৰ কু-কৰ্মৰ কথা কৈ হুক হুকাই কান্দি উঠিল সংবাদ মাধ্যমৰ আগত ৷ ’’2022 চনৰ আগষ্ট মাহৰ এটা দিনত মোক এটা গাঁত খান্দিবলৈ কোৱাত মই খান্দিলো ৷ তাৰ পাচতে মোক তাতে জীয়াই জীয়াই পুতি থোৱাৰ চেষ্টা কৰিছিল ৷ মোক এনেকৈ পুতি থোৱাতকৈ মাৰি পেলাই পুতি থ ৷ কেতিয়াবাই সি মোক জ্বলা চিগাৰেট শৰীৰৰ বিভিন্ন অংগত লগাই দিয়ে ৷ কেতিয়াবা চোকা অস্ত্ৰৰে আক্ৰমণ কৰে ৷ তাৰ আক্ৰমণত মই কথা ক’ব নোৱাৰা হৈছিলো ৷ মুখত বৰকৈ আঘাত পাইছিলো ৷ বহু দিনৰ পৰা আমাক অত্যাচাৰ কৰি আহিছিল ৷ আমি অতিষ্ঠ হৈ ৰে’ল আগত পৰি আত্মহত্যাৰ চেষ্টা কৰিছিলো ৷ কিন্তু আত্মহত্যা কৰাটো পাপ হ’ব বুলি ভাবি নকৰিলো ৷ অৱশেষত পুত্ৰৰ অত্যাচাৰ সহিব নোৱাৰি ২১ জুলাইত ঘৰাৰ পৰা পলাই আহিলো ৷ এতিয়া আশ্ৰমতো আমাক শান্তিৰে থাকিবলৈ দিয়া নাই ৷’’ এয়া দুৰ্ভগীয়া পিতৃৰ মন্তব্য ৷
আনহাতে মঙলবাৰে নিশা অৰূপ কুমাৰ কলিতাই লগত বন্ধুবৰ্গক লৈ বৃদ্ধাশ্ৰমখনত প্ৰৱেশ কৰে ৷ ফলত সৃষ্টি হয় উত্তপ্ত পৰিস্থিতিৰ । লগতে অশ্লীল ভাষাৰে গালি গালাজ কৰে বৃদ্ধাশ্ৰমখনৰ দায়িত্বত থকা মহিলাগৰাকীক । আৰক্ষীক খবৰ দিয়াৰ লগে লগে বৃদ্ধাশ্ৰমৰ পৰা পলাই যায় অৰূপ কুমাৰ কলিতাই। সমগ্ৰ ঘটনা সন্দৰ্ভত হাতীগাঁও আৰক্ষীৰ লগতে আমিনগাঁও আৰক্ষী অধীক্ষকৰ কাষ চাপিছে অসহায় বৃদ্ধ দম্পত্তি।
