গুৱাহাটী, ২৩ জুন : নিলাম প্ৰক্ৰিয়াত কোনেও অংশ নোলোৱাত বিক্ৰী মূল্য হ্ৰাস কৰা হৈছে দুটাকৈ কাগজ কলৰ । নগাঁও আৰু কাছাৰ কাগজ কল নিলামৰ বাবে ৰাষ্ট্ৰীয় কোম্পানী আইন আপীল ন্যায়াধিকৰণে নিয়োগ কৰা লিকুইডেটৰ কুলদ্বীপ বাৰ্মাই পুনৰ নতুনকৈ বিজ্ঞাপন প্ৰকাশ কৰিছে । প্ৰথমবাৰ কোনো আগবাঢ়ি নহাৰ বাবে এইবাৰ হিন্দুস্তান পেপাৰ ক’ৰ্পৰেচন লিমিটেডৰ (Hindustan paper corporation Ltd) অধীনস্থ কাগজ কল দুটাৰ বিক্ৰীৰ মূল্য পূৰ্বতকৈ হ্ৰাস কৰিছে লিকুইডেটৰে । পূৰ্বতে লিকুইডেটৰে ১ জুনত কাগজ কল দুটাৰ মূল্য ১,১৩৯ কোটি টকা নিৰ্ধাৰণ কৰিছিল যদিও দ্বিতীয়বাৰৰ বাবে প্ৰকাশ কৰা নিলামৰ বিজ্ঞাপনত নতুন মূল্য হ্ৰাস কৰি ৯৬৯ কোটি টকা কৰিছে ।
ইচ্ছুক প্ৰতিষ্ঠানে ৪৮ কোটি টকা আৰনেষ্ট মানী (earnest money) জমা দি কাগজ কল (Paper mill) দুটা ক্ৰয়ৰ বাবে ‘বুক’ কৰিব পাৰিব বুলি বিজ্ঞাপনত (Advertisement) কোৱা হৈছে । উল্লেখ যে বিধানসভাৰ নিৰ্বাচনত বিজেপিয়ে নগাঁও আৰু কাছাৰ কাগজ কল পুনৰুজ্জীৱিত কৰাৰ প্ৰতিশ্ৰুতি দিছিল যদিও চৰকাৰ গঠন কৰাৰ পাছত কাগজ কল দুটা বিক্ৰী কৰাতহে লিকুইডেটৰক সেউজ সংকেত দিয়া দেখা গ’ল । যাৰ বাবে অসম চৰকাৰৰ অনুমতি সাপেক্ষে কাগজ কল দুটা বিক্ৰী কৰাৰ বাবে দুবাৰকৈ নিলামৰ বিজ্ঞাপন প্ৰকাশ কৰিছে লিকুইডেটৰ কুলদ্বীপ বাৰ্মাই । কলকাতাৰ পৰা প্ৰকাশ কৰা বিজ্ঞাপন অনুসৰি দুয়োটা কাগজ কলৰ এইবাৰৰ মূল্য ৯৬৯ কোটি টকা নিৰ্ধাৰণ কৰা হৈছে ।
ইচ্ছুক প্ৰতিষ্ঠানে ই এম ডি (EMD) মাচুল ৪৮ কোটি টকাসহ ৬ জুলাইৰ সন্ধিয়া ৬ বজাৰ পৰা ভিতৰত ই-নিলাম (E-auction) প্ৰক্ৰিয়াত অংশ ল’ব লাগিব । নিলামত ভাগ লোৱা প্ৰতিষ্ঠানৰ ভিতৰত সৰ্বোচ্চ মূল্য দিয়া প্ৰতিষ্ঠানক ২২ জুলাইত কাগজ কলৰ মালিকী স্বত্ব (ownership) হস্তান্তৰ কৰা হ’ব । লক্ষণীয়ভাৱে সোণোৱাল চৰকাৰে বিগত বৰ্ষৰ ১০ ছেপ্তেম্বৰত এন চি এল টিত কাগজ কল দুটা ৰাজ্য চৰকাৰে নিজাববীয়াকৈ পুনৰুজ্জীৱিতকৰণৰ ব্যৱস্থা কৰিব বুলি শপতনামা দাখিল কৰিছিল ৷
কিন্তু ক্ষমতালৈ বিজেপি মিত্ৰজোঁটৰ চৰকাৰ পুনৰ আহিল যদিও ৰাজ্যৰ ৫০ হাজাৰ লোকক পৰোক্ষ তথা প্ৰত্যক্ষভাৱে কৰ্ম সংস্থাপন দিয়া কাগজ কল দুটা জীয়াই তোলাৰ বাবে কোনো পদক্ষেপ গ্ৰহণ নকৰিলে । উল্লেখ্য যে, এইবাৰো যদি কোনো প্ৰতিষ্ঠান কাগজ কল দুটা ক্ৰয়ৰ বাবে আগবাঢ়ি নাহে তেন্তে কি হ'ব । পানীৰ দৰত বিক্ৰী হ'ব নেকি কাগজ কল দুটা !
লগতে পঢ়ক: ক'ভিড-19 ভেকচিন লোৱা যাত্ৰীক 10 শতাংশ মাচুল ৰেহাই ইণ্ডিগ'ৰ
