গুৱাহাটী, ৪ নৱেম্বৰ : এইবাৰ ‘অভিমন্যু বধ’ বিতৰ্ক ৷ আকৌ এবাৰ প্ৰদেশ কংগ্ৰেছৰ সভাপতি ভূপেন বৰাৰ মন্তব্যক লৈ জাঙুৰ খাই উঠিছে মন্ত্ৰী পীযুষ হাজৰীকা । মধ্যপ্ৰদেশ, ছত্তীশগড় আৰু ৰাজস্থানৰ জনতা কৌৰৱ নেকি বুলি প্ৰশ্ন কৰি ভূপেন বৰাক ক্ষমা বিচাৰিবলৈ দাবী মন্ত্ৰী হাজৰীকাৰ ৷
দেওবাৰে ঘোষিত ৪ ৰাজ্যৰ বিধানসভা নিৰ্বাচনৰ ফলাফলক লৈ সোমবাৰে আগবেলা গুৱাহাটীৰ ৰাজীৱ ভৱনত এক সংবাদমেল আয়োজন কৰি নিজৰ প্ৰতিক্ৰিয়া প্ৰকাশ কৰে এপিচিচিৰ সভাপতি গৰাকীয়ে ৷ প্ৰসংগক্ৰমে ভূপেন বৰাই উল্লেখ কৰে যে, এই নিৰ্বাচনত অভিমন্যু বধ হ’ল ৷ এই প্ৰসংগত ভূপেন বৰাৰ মন্তব্যৰ প্ৰতিক্ৰিয়া প্ৰকাশ পীযুষ হাজৰীকাৰ ।
“নিৰ্বাচন হৰাৰ পিচত পৰাজয় বিনম্ৰতাৰে মানি লোৱাৰ সলনি কংগ্ৰেছে নাৰায়ণৰূপী জনতাক কৌৰৱ বুলি গালি পৰা দেখি মৰ্মাহত হৈছোঁ । প্ৰদেশ কংগ্ৰেছৰ সভাপতি ভূপেন বৰাই নিৰ্বাচনত অভিমন্যুক বধ কৰি কৌৰৱে উল্লাস কৰা বুলি কি বুজাব বিচাৰিছে ? ৰাজস্থান, মধ্যপ্ৰদেশ আৰু ছত্তীশগড়ৰ জনতা কংগ্ৰেছক ভোট নিদিয়াৰ বাবেই কৌৰৱ হৈ গ’ল নেকি ? এনেকৈ ভোট নোপোৱা বাবেই জনতাক কৌৰৱ সজোৱাৰ নিকৃষ্ট মানসিকতাক গৰিহণা দিছোঁ”, দিল্লীত সোমবাৰে এইদৰে ভূপেন বৰাই কৰা মন্তব্যৰ প্ৰতিক্ৰিয়া আগবঢ়ায় মন্ত্ৰী পীযুষ হাজৰীকাই ৷
