গুৱাহাটী,19 ফেব্ৰুৱাৰীঃ কৃষক মুক্তি সংগ্ৰাম সমিতিৰ উপদেষ্টা অখিল গগৈক মাওবাদীৰে সম্পৰ্ক থকাৰ অভিযোগত কাৰাগাৰত বন্দী কৰি ৰখা ঘটনাক সমালোচনা নৰ্মদা বচাও আন্দোলনৰ নেত্ৰী মেধা পাটেকাৰ আৰু সমাজকর্মী সন্দীপ পাণ্ডেৰ ৷ বুধবাৰে দুপৰীয়া ১২ বজাত দুয়োগৰাকী সমাজকৰ্মীয়ে লাখৰাস্থিত কেন্দ্ৰীয় কাৰাগাৰত উপস্থিত হৈ অখিল গগৈৰ লগতে কাৰাবন্দী হৈ থকা কৃষক মুক্তি সংগ্ৰাম সমিতিৰ অন্যান্য নেতাসকলকো সাক্ষাৎ কৰে ৷
কাৰাগাৰৰ ভিতৰত প্ৰায় ২ ঘণ্টা কৃষক মুক্তি সংগ্ৰাম সমিতিৰ নেতাসকলৰ সৈতে আলোচনাত মিলিত হয় দুয়োগৰাকী সমাজকৰ্মী ৷ মেধা পাটেকাৰে কয় যে, কোনোধৰণৰ প্ৰমাণ নোহোৱাকৈ অখিক গগৈসহ কৃষক মুক্তি সংগ্ৰাম সমিতিৰ অন্যান্য নেতা সকলক মাওবাদীৰ অভিযোগত গ্ৰেপ্তাৰ কৰাটো গৰিহণাৰ যোগ্য ৷ চৰকাৰে গণতান্ত্ৰিক আন্দোলনকাৰীসকললৈ ভয় কৰিছে ৷ অখিল গগৈসহ কৃষক মুক্তি সংগ্ৰাম সমিতিৰ অন্যান্য নেতাসকল ৰাজনৈতিক ষড়যন্ত্ৰৰ বলি হৈছে ৷
আনহাতে, সমাজকর্মী সন্দীপ পাণ্ডেই কা বিৰোধী আন্দোলনকাৰী সকলক গ্ৰেপ্তাৰৰ সমালোচনা কৰি চৰকাৰে ৰাজনৈতিক ষড়যন্ত্ৰ কৰি অখিল গগৈক কাৰাবন্দী কৰি ৰাখিছে বুলি মন্তব্য কৰে ৷ অখিল গগৈ বিজেপিৰ বাবে এক ডাঙৰ প্ৰত্যাহ্বান বাবে বিজেপিয়ে তেখেতক মাওবাদীৰ গোচৰত গ্ৰেপ্তাৰ কৰিছে ৷ সন্দীপ পাণ্ডেই নাগৰিকত্ব সংশোধনী আইন বিৰোধী আন্দোলনক ৰাজপথৰ পৰা খেলপথাৰলৈ লৈ যোৱা বুলি সদৌ অসম ছাত্ৰ সন্থাকো তীব্ৰ ভাষাৰে গৰিহণা দিয়ে ৷ তেখেতে কয় যে, চৰকাৰে আছুক ব্যৱহাৰ কৰি নাগৰিকত্ব সংশোধনী আইন বিৰোধী আন্দোলনক চৰকাৰী ভাবে চলাই নিয়াৰ চেষ্টা কৰিছে ৷ আন্দোলনক ৰাজপথৰ পৰা খেলপথাৰলৈ লৈ যোৱাটো একমাত্ৰ চৰকাৰৰ ষড়যন্ত্ৰ ৷
উল্লেখ্য যে, দুয়োগৰাকী সমাজকৰ্মীয়ে দুদিনীয়া অসম ভ্ৰমণত বৃহস্পতিবাৰে ৰাজ্যখনৰ সাংবাদিক, সমাজকর্মী, বুদ্ধিজীৱি সকলৰ সৈতে আলোচনাত মিলিত হ'ব ৷
লগতে পঢ়ক-বঙাইগাঁৱত নামনিমুৱা ত্ৰিবান্দ্ৰম এক্সপ্ৰেছৰ খুন্দাত থিতাতে নিহত দম্পতী
