গুৱাহাটী, 25 অক্টোবৰ : উৎসৱ-পাৰ্বণৰ সময়ত ৰাজ্যত সুৰাৰ বিক্ৰীয়ে অভিলেখ সৃষ্টি কৰাটো নতুন কথা নহয় ৷ প্ৰত্যেক বছৰেই বিভিন্ন উৎসৱ-পাৰ্বনৰ সময়ত অসমত সুৰাৰ বিক্ৰীয়ে অভিলেখ সৃষ্টি কৰি আহিছে ৷ এইবাৰো তাৰ ব্যতিক্ৰম হোৱা নাই ৷
মঙলবাৰে বিজয়া দশমীৰে শাৰদীয় দুৰ্গোৎসৱৰ সামৰণি পৰিল ৷ শাৰদীয় দুৰ্গোৎসৱৰ উখল-মাখল পৰিৱেশৰ মাজত গুৱাহাটী মহানগৰীত সুৰাপায়ী সকলে গঢ়িলে অভিলেখ ৷ দুৰ্গা পূজাৰ তিনিদিনত গুৱাহাটী মহানগৰীত বিক্ৰী হ'ল 22.5 কোটি টকাৰ সুৰা ৷ বিগত বৰ্ষত এই পৰিমাণ আছিল 16.80 কোটি টকা ৷ এইবছৰ সুৰাৰ বিক্ৰী প্ৰায় 6 কোটি টকালৈ বৃদ্ধি পালে ৷ লক্ষণীয় বিষয় যে এইবাৰ দশমীৰ দিনাও সুৰাৰ বিপণি খোলা আছিল ৷
ৰাজহ লাভৰ বাবে চৰকাৰে এইবাৰ দশমীত সুৰাৰ বিপণি বন্ধ ৰখাৰ পূৰ্বৰ নিৰ্দেশ বাহাল নাৰাখিলে ৷ সাধাৰণতে দশমীৰ দিনা সুৰাৰ বিপণি বন্ধ থাকে ৷ কিন্তু এইবাৰ দশমীতো সহজলভ্য কৰা হ'ল সুৰা ৷ যাৰ বাবে বিক্ৰীৰ পৰিমাণো যথেষ্ট বৃদ্ধি পালে আৰু চৰকাৰে ৰাজহো বেছিকৈ পালে ৷
আবকাৰী বিভাগৰ তথ্য মতে গুৱাহাটী মহানগৰীত অষ্টমী, নৱমী আৰু দশমীৰ দিনা অৰ্থাৎ তিনি দিনত 22.5 কোটি টকাৰ সুৰা বিক্ৰী হয় ৷ লক্ষণীয় বিষয় যে প্ৰত্যেক বছৰেই ৰাজধানী চহৰখনত সুৰা বিক্ৰী ক্ৰমাৎ বৃদ্ধি পাব ধৰিছে ৷ অৱশ্যে এয়া ভাল নে বেয়া সেয়া ৰাইজেই বিচাৰ কৰিব ৷ কিন্তু এটা কথা ঠিক যে চৰকাৰখনে সুৰাৰ বিক্ৰী বৃদ্ধিত বিশেষ গুৰুত্ব দিছে ৷ যাতে ৰাজহৰ পৰিমাণ বৃদ্ধি পায় ৷ ইয়াৰ বাবে চৰকাৰে সুৰাৰ বিপণি বৃদ্ধিত বিশেষ গুৰুত্ব দিছে ৷ আনকি দশমীৰ দিনা থকা ড্ৰাই ডে' পৰ্যন্ত উঠাই দিছে ৷
উল্লেখ্য যে বিশ্বকৰ্মা পূজাৰ দিনাও অভিলেখ পৰিমাণৰ সুৰা বিক্ৰী হৈছিল গুৱাহাটী মহানগৰীত ৷ এইবাৰ বিশ্বকৰ্মা পূজাৰ দিনা গুৱাহাটী মহানগৰীত 8.40 কোটি টকাৰ সুৰা বিক্ৰী হৈছিল ৷ 2022 বৰ্ষত বিশ্বকৰ্মা পূজাৰ দিনা বিক্ৰী হৈছিল 6.20 কোটি টকাৰ সুৰা ৷ আনহাতে 2021 বৰ্ষত এই পৰিমাণ আছিল 3.70 কোটি টকা ৷ অৰ্থাৎ প্ৰত্যেক বছৰেই বিক্ৰীৰ হাৰ বৃদ্ধি হৈছে ৷ নৱবৰ্ষ, দুৰ্গা পূজা, কালী পূজা, বিশ্বকৰ্মা পূজা, ফাকুৱা, বিহু আদি বিভিন্ন উৎসৱ-পাৰ্বনত নতুন নতুন অভিলেখ গঢ়ি সুৰা বিক্ৰী ক্ৰমাৎ বৃদ্ধি পাই গৈ আছে ৷
আবকাৰী বিভাগৰ তথ্য মতে অসমত বৰ্তমান 1,684 খন বিলাতী সুৰাৰ দোকান থকাৰ উপৰিও 896 খন বাৰ আৰু 486 খন দেশীয় সুৰাৰ দোকান আছে ৷ চৰকাৰী তথ্য মতে চলিত 2023-24 বিত্তীয় বৰ্ষৰ প্ৰথম পাঁচটা মাহতে অসমত আবকাৰী ৰাজহ সংগ্ৰহ হৈছিল 1,718.75 কোটি টকা ৷ উল্লেখ্য যে অসমত দৈনিক গড়ে 10.86 কোটি টকাৰ আবকাৰী ৰাজহ সংগ্ৰহ হয় ৷ সুৰাৰ পৰাই বছৰি প্ৰায় চাৰি হাজাৰ কোটি টকাৰ ৰাজহ সংগ্ৰহ হয় ৷ এক কথাত ক'বলৈ গ'লে ৰাজকোষ টনকিয়াল কৰাৰ ক্ষেত্ৰত সুৰাপায়ী সকলৰো বিশেষ ভূমিকা আছে ৷
লগতে পঢ়ক : Opposition Unity Forum: আসন বুজাবুজিক লৈ বৃহস্পতিবাৰে গুৱাহাটীত বিৰোধী ঐক্য মঞ্চৰ গুৰুত্বপূৰ্ণ বৈঠক
