গুৱাহাটী, 10 নৱেম্বৰ : অতীজৰে পৰা দেশৰ কৃষকসকলৰ অৱস্থা তেনেই শোচনীয় হোৱা সকলোৱে দেখি আহিছে ৷ বছৰৰ বাৰ মাহে শস্যৰ বাবে কৃষকসকলৰ ওপৰত নিৰ্ভৰ কৰিবলগীয়া হয় যদিও তেওঁলোকৰ সমস্যা সমূহ সমাধান কৰাৰ ক্ষেত্ৰত আজিলৈকে কোনো এখন চৰকাৰেই সহায় নকৰিলে ৷ নিম্ন মানদণ্ডৰ শস্য, পানীৰ অভাৱ আদি এশ-এবুৰি সমস্যাই লগ নেৰে কৃষকসকলক ৷ প্ৰায় এবছৰ ধৰি দেশত অব্যাহত থকা কৃষকসকলৰ প্ৰতিবাদৰ কথা নকলোৱেই বা ৷
অসমতো কৃষি কাৰ্যত সুবিধা হোৱাৰ অৰ্থে ৰাজ্য চৰকাৰে মুকলি কৰিছিল কেইবাখনো বিলাসী আঁচনি ৷ কিন্তু সেই সমূহৰ ভিতৰত কেইখন আজিৰ তাৰিখত কাৰ্যক্ষম তাৰে হয়তো সঠিক হিচাপ নোলাব ৷
ৰাজ্য চৰকাৰৰ অধীনষ্ঠ বিয়াগোম জলসিঞ্চন বিভাগে পানী যোগানৰ সুবিধাৰ্থে মহানগৰীৰ সমীপৰ চন্দ্ৰপুৰৰ ঠাকুৰকুছিত মুকলি কৰিছিল এক বিলাসী পানীযোগান আঁচনি ৷ প্ৰায় 30 লাখ টকা ব্যয়সাপেক্ষে নিৰ্মাণ কৰা আঁচনিখন কাৰ্যকৰী কৰাৰ ফলত উপকৃত হোৱাৰ ধাৰণা কৰিছিল স্থানীয় কৃষকসকলে ৷ আঁচনিখন মুকলি হ’ল ঠিকেই, কিন্তু কামত নাহিল কৃষকসকলৰ ৷
চলিত বৰ্ষৰ ১৫ ফেব্ৰুৱাৰীত মুকলি কৰা হৈছিল সৌৰশক্তি চালিত পানী যোগান আঁচনিখন ৷ প্ৰায় ১০ হেক্টৰ কৃষি ভূমিত পানী যোগান ধৰাৰ উদ্দেশ্যে আঁচনিখন মুকলি কৰা বুলি সেই সময়ত সদৰী কৰিছিল বিভাগীয় অভিযন্তাই ৷ সেয়েহে অঞ্চলটোৰ কৃষকসকলে শালিধানৰ খেতিৰ বাবে প্ৰস্তুতি চলাই যদিও সময়ত লাভ নকৰিলে এটোপালো পানী ৷ ফলত পানীৰ অভাৱত বহু কৃষি ভূমি ছন পৰি থাকিবলগীয়া পৰিস্থিতিৰ সৃষ্টি হয় ৷
স্থানীয় কৃষকসকলে অভিযোগ কৰা অনুসৰি, পথাৰত পানী যোগানৰ বাবে স্থাপন কৰা মেচিন চলালে প্ৰথম ১৫-২০ মিনিট সময় ঠিকে পানী ওলায় ৷ কিন্তু তাৰপিছত আৰু মেচিনেৰে পানী ওলোৱাটো বন্ধ হৈ পৰে ৷ সেয়ে কৃষকসকলে নিৰ্ভৰ কৰিবলগীয়া হয় বৰষুণৰ পানীৰ বাবে ৷
কৃষকসকলে বিভাগীয় কৰ্তৃপক্ষৰ লগতে প্ৰকল্পটো নিৰ্মাণৰ দায়িত্বত ন্যস্ত ঠিকাদাৰক কথাটো অৱগত কৰিছিল যদিও বিভাগীয় ঠিকাদাৰে অভিযন্তালৈ আৰু অভিযন্তাই ঠিকাদাৰলৈ দোষ জাপি দি সামৰে দায়িত্ব ৷ ফলত খেতিপথাৰত তীব্ৰ পানীৰ সমস্যাত ভূগিবলগীয়া হৈছে কৃষকসকলে ৷ তথাপিও এই আঁচনি কাৰ্যক্ষম কৰি তুলি কৃষকসকলে তেওঁলোকৰ সমস্যা দুৰ কৰিবলৈ আহ্বান জনাইছে বিভাগীয় কৰ্তৃপক্ষক ৷
লগতে চাওক: মৃত্যুৰ ওচৰত হাৰ মানিলে ৰাজকন্যাই খুন্দিয়াই ঘূণীয়া কৰা যোছেফ মাৰাকে
