গুৱাহাটী, ৪ জুলাই: এইবাৰো লক্ষ্যত উপনীত হ'ব নোৱাৰিলে ৰাজ্য চৰকাৰ । কৃষকৰ পৰা ১০ লাখ মেট্ৰিক টন ধান ক্ৰয় কৰাৰ বাবে অসম চৰকাৰে লক্ষ্য নিৰ্ধাৰণ কৰিছিল । কিন্তু কৃষকৰ পৰা ন্যূনতম সমর্থন মূল্যত ধান ক্ৰয়ৰ সময়সীমা ৩০ জুনত অন্ত পৰিল যদিও এইবাৰো চৰকাৰে ১০ লাখ মেট্রিক টন ধান ক্ৰয়ৰ নিৰ্ধাৰিত লক্ষ্যত উপনীত হ'ব নোৱাৰিলে । কেন্দ্ৰীয় তথা ৰাজ্য চৰকাৰৰ অধীনস্থ প্রতিষ্ঠানসমূহক চৰকাৰে লক্ষ্য বান্ধি দিছিল যদিও ধান ক্ৰয় কৰাৰ দায়িত্বত থকা প্রতিষ্ঠানকেইটাই কৃষকৰ পৰা নিৰ্ধাৰিত পৰিমাণৰ ধান ক্রয় কৰিব নোৱাৰিলে । ফলত চৰকাৰে দিয়া প্ৰতিশ্ৰুতি ৰক্ষাত পুনৰবাৰ ব্যৰ্থ হ'ল ।
ৰাজ্য় চৰকাৰৰ অধীনস্থ প্রতিষ্ঠান খাদ্য আৰু অসামৰিক যোগান নিগমে ধান ক্ৰয়ৰ নিৰ্দিষ্ট পৰিমাণত উপনীত হ'ব নোৱাৰিলে যদিও প্রতিষ্ঠানটোৰ ধান ক্ৰয়ৰ পৰিমাণ আশাব্যঞ্জক আছিল । অসম কৃষি সামগ্রী বিপণন পৰিষদেহে দায়িত্ব পোৱা অনুসৰি কৃষকৰ পৰা ধান ক্রয় কৰিবলৈ সক্ষম হয় । ইয়াৰ বিপৰীতে ভাৰতীয় খাদ্য নিগমকে ধৰি কেন্দ্ৰীয় চৰকাৰৰ আন প্রতিষ্ঠানকেইটাই অসমৰ কৃষকৰ পৰা ধান ক্রয়ত সম্পূৰ্ণ অনীহা দেখুওৱাৰ কথা স্পষ্ট হৈ পৰিল ।
উল্লেখ্য যে ৰাজ্য চৰকাৰে মুঠ ছটা প্রতিষ্ঠানক অসমৰ কৃষকে উৎপাদন কৰা প্ৰথম খেতিৰ প্ৰায় ১০ লাখ মেট্রিক টন ধান ক্ৰয়ৰ লক্ষ্য বান্ধি দিছিল । কিন্তু ৩০ জুনত ধান ক্ৰয়ৰ সময়সীমা শেষ হ'ল যদিও ৫,৯২,৮৪৬ মেট্রিক টন ধানহে প্ৰতিষ্ঠান কেইটাইক্ৰয় কৰিবলৈ সক্ষম হৈছে। অর্থাৎ নিৰ্ধাৰিত লক্ষ্যৰ তিনি লাখ মেট্রিক টন ধান ক্ৰয় কৰাত ব্যৰ্থ হ'ল । অৱশ্যে বিগত বৰ্ষতকৈ এইবাৰ ন্যূনতম সমৰ্থিত দামত ধান ক্ৰয়ৰ পৰিমাণ বৃদ্ধি হৈছে । খাদ্য আৰু অসামৰিক বিভাগৰ তথ্য মতে, ৰাজ্যৰ বিভিন্ন স্থানত স্থাপন কৰা মুঠ ২০৪টা কেন্দ্ৰত প্রতিষ্ঠানসমূহে ৬১,১১৫ গৰাকী কৃষকৰ পৰা কুইণ্টলে প্রতি ১৯৪০ টকা দৰত ধান ক্রয় কৰিছিল ।
আন আন বছৰৰ দৰে কেন্দ্ৰীয় চৰকাৰৰ অধীনস্থ বৃহৎ প্রতিষ্ঠান ভাৰতীয় খাদ্য নিগমে অসমৰ কৃষকৰ পৰা ন্যূনতম সমর্থিত দামত ধান ক্ৰয় কৰাৰ ক্ষেত্ৰত চৰম অবহেলা কৰে । ৰাজ্য চৰকাৰে এফ চি আইক কৃষকৰ পৰা মুঠ ৪.০৪ লাখ মেট্রিক টন ধান ক্ৰয় কৰিবলৈ দায়িত্ব দিছিল যদিও প্রতিষ্ঠানটোৱে মাত্র ১.৯৪ লাখ মেট্রিক টন ধানহে ন্যূনতম সমর্থন মূল্যত ক্রয় কৰে । ইফালে, অসম চৰকাৰৰ অধীনস্থ খাদ্য আৰু যোগান নিগমক ৪,১৭,৫০০ মেট্রিক টন ধান ক্ৰয়ৰ দায়িত্ব দিয়া হৈছিল । ইয়াৰ বিপৰীতে প্ৰতিষ্ঠানটোৱে ৩,৪৪,১৬১ মেট্রিক টন ধান ক্রয় কৰে । কৃষি সামগ্রী বিপণন পৰিষদক বান্ধি দিয়া লক্ষ্যত প্রতিষ্ঠানটো উপনীত হয় । ইয়াৰ বিপৰীতে এফ চি আইৰ দৰে কেন্দ্ৰীয় চৰকাৰৰ আন প্রতিষ্ঠান ক্ৰমে নাক'ফ, নাফেড আৰু এন চি চি এফেও ন্যূনতম সমৰ্থিত দামত নিৰ্ধাৰণ কৰা অনুসৰি অসমৰ কৃষকৰ পৰা ধান ক্রয় নকৰিলে ।
অসমৰ কৃষকৰ পৰা ধান ক্ৰয়ৰ (প্রথম খেতি) নিৰ্ধাৰিত সময় অন্ত পৰাৰ পাছত দ্বিতীয় খেতি (খাৰিফ) ক্রয় কৰিবলৈ সাজু হৈছে ৰাজ্য চৰকাৰ । খাৰিফ বতৰত কৃষকে উৎপাদন কৰা ধান ক্ৰয়ৰ বাবে ৰাজ্য চৰকাৰে লক্ষ্য গ্ৰহণ কৰিছে । ধানৰ দ্বিতীয় খেতি (খাৰিফ) কৃষকৰ পৰা ন্যূনতম সমৰ্থিত দামত ১,৩৪,৫০০ মেট্রিক টন ক্ৰয় কৰিবলৈ লক্ষ্য লৈছে । অৱশে এইবাৰ ছটাৰ পৰিৱৰ্তে চাৰিটা প্রতিষ্ঠানকহে ধান ক্ৰয়ৰ দায়িত্ব দিয়া হৈছে । এইবাৰ এন চি চি এফ আৰু নাক'ফক ধান ক্ৰয়ৰ দায়িত্ব দিয়া হোৱা নাই । লক্ষণীয় বিষয় যে ইয়াৰ পূৰ্বেও কোনো এবাৰো ধান ক্ৰয়ৰ ক্ষেত্রত ৰাজ্য চৰকাৰে নিৰ্ধাৰিত লক্ষ্যত উপনীত হ'ব পৰা নাই ।
লগতে পঢ়ক:জঘন্য! মুকবধিৰ মাতৃ আৰু কন্যাক ধৰ্ষণ কৰি যৌনাংগত ঢালিলে জলকীয়াৰ গুড়ি
