গুৱাহাটী, 3 ডিচেম্বৰ : বৃহস্পতিবাৰে দীঘলীপুখুৰীৰ পাৰত অসম প্ৰতিবন্ধী সুৰক্ষা সংস্থাৰ উদ্যোগত এক প্ৰতিবাদী সমদল বাহিৰ কৰা হয় ৷ সমদলত অংশ লয় ৰাজ্যৰ ভিন্ন প্ৰান্তৰ প্ৰায় শতাধিক প্ৰতিবন্ধী লোকে ৷ প্ৰতিবাদত অংশ লৈ অসম প্ৰতিবন্ধী সুৰক্ষা সংস্থাৰ সম্পাদক নৃপেন মালাকাৰৰ অভিযোগ, “সৰ্বানন্দ সোণোৱাল আচলতে এগৰাকী ব্যৰ্থ মুখ্যমন্ত্ৰী ৷ কেৱল প্ৰতিবন্ধীসকলৰ বাবেই নহয় সৰ্বসাধাৰণ লোকৰ হিতৰ বাবে ঘোষণা কৰা আঁচনি ৰূপায়ণত সম্পূৰ্ণ ৰূপে ব্যৰ্থ হৈছে সোণোৱাল ৷”
উল্লেখ্য যে, বৃহস্পতিবাৰৰ বিশ্ব প্ৰতিবন্ধী দিৱসৰ দিনাই মুখ্যমন্ত্ৰী সোণোৱালে প্ৰতিবন্ধীসকলৰ বাবে মুকলি কৰাৰ কথা আছিল এক বিশেষ গৃহ প্ৰদানৰ অভিলাষী আঁচনি ৷ উক্ত আঁচনিৰ সন্দৰ্ভত ইতিমধ্যে বিভিন্ন মাধ্যমৰ যোগেদি বৃহৎ ধন খৰছ কৰি একাধিকবাৰ বিজ্ঞাপনো প্ৰকাশ কৰিছিল ৰাজ্যৰ জনসংযোগ বিভাগে ৷ কিন্তু তাৎপৰ্যপূৰ্ণভাৱে এই দিনটোতেই এই আঁচনি ঘোষণা কৰাৰ পৰা বিৰত থাকে মুখ্যমন্ত্ৰী সোণোৱাল ৷ যাৰ বাবে ক্ষুন্ন হৈ পৰে ৰাজ্যৰ প্ৰতিবন্ধীসকল ৷
লগতে পঢ়ক : সচিবালয়ৰ সন্মুখত চ্যুকাফাৰ প্ৰতিমূৰ্তি নিৰ্মাণৰ ঘোষণা মুখ্যমন্ত্ৰী সোণোৱালৰ
