গুৱাহাটী, ২৮ মে': ৰাজ্যিক বিজেপিৰ হেঙেৰাবাৰীস্থিত মুখ্য কাৰ্যালয়ত শুকুৰবাৰে এক যােগদান কার্যসূচীৰ আয়োজন কৰা হয় । অনুষ্ঠানত দৰঙাজুলী পৰিষদীয় সমষ্টিৰ প্ৰাক্তন বি পি এফৰ কাৰ্যবাহী সদস্য (ই.এম) তথা একেৰাহে তিনিবাৰকৈ এম চি এলৰ দায়িত্ব নির্বাহ কৰা বিজিত গৌড়া নাৰ্জাৰীয়ে আনুষ্ঠানিকভাৱে বিজেপি দলত যােগদান কৰে । দলৰ ৰাজ্যিক সভাপতি তথা অসম চৰকাৰৰ কেবিনেট মন্ত্রী ৰণজিৎ কুমাৰ দাসে নাৰ্জাৰীক দললৈ আদৰণি জনায় ।
অনুষ্ঠানত সভাপতি দাসে কয় যে, ভাৰতীয় জনতা পার্টি কেৱল এটা ৰাজনৈতিক দল নহয় এটা মিছন আৰু এই মিছনৰ লক্ষ্যত উপনীত হােৱা বাবে দলে অবিৰতভাৱে কাম কৰি যাব । শেহতীয়া বিধানসভা নির্বাচন প্রসংগত সভাপতি গৰাকীয়ে কয় যে বি টি এ ডিৰ ১২ টা সমষ্টিত বিজেপি নেতৃত্বাধীন মিত্ৰজোঁটে যথেষ্ট ভাল ফলাফল দেখুৱাবলৈ সক্ষম হৈছে । মিত্ৰজোঁটে লাভ কৰা ৮ লাখ ৬২ হাজাৰ ১৮১ টা ভােটৰ বিপৰীতে কংগ্ৰেছ নেতৃত্বাধীন মহাজোঁটে ৬ লাখ ৫১ হাজাৰ ৭৩ টা ভােটহে লাভ কৰিবলৈ সক্ষম হয় ।
সভাপতিগৰাকীৰ মতে বি টি এ ডি অঞ্চলত অনাগত দিনত বিকাশৰ ধাৰা আৰু অধিক তৰান্বিত কৰাৰ বাবে ভাৰতীয় জনতা পার্টি দৃঢ় প্রতিশ্রুতিৱদ্ধ । দলে সাংগঠনিক ভেঁটি অধিক শক্তিশালী কৰাৰ বাবে বিভিন্ন কার্যসূচী হাতত লৈছে । তেওঁ লগতে কয় যে, ২০২১ চনৰ বিধানসভা নির্বাচনৰ প্রতিটো বিধানসভা সমষ্টিৰ বুথ ভিত্তিক পর্যালােচনা কৰাৰ বাবে অসমৰ ১৪ টা লােকসভা সমষ্টিত একোগৰাকীকৈ পর্যবেক্ষক নিয়ােগ কৰা হৈছে ।
দলৰ ৰাজ্যিক সাংগঠনিক সাধাৰণ সম্পাদক, উপ-সভাপতি, উপ-সভানেত্রী, সাধাৰণ সম্পাদক, সম্পাদক, কোষাধ্যক্ষসকলক এই দায়িত্ব অর্পণ কৰা হৈছে । অনাগত দিনত দলে সাংগঠনিক ভেঁটি আৰু অধিক সুদৃঢ় কৰাৰ বাবে বিভিন্ন কার্যসূচী ৰূপায়ন কৰিব বুলিও তেওঁ উল্লেখ কৰে । ৰাজ্যিক সাধাৰণ সম্পাদক তথা সাংসদ পল্লৱ লােচন দাসে আঁত ধৰা উক্ত অনুষ্ঠানত ৰাজ্যিক উপ-সভাপতিদ্বয় ক্রমে স্বপ্ননীল বৰুৱা আৰু মিহিনেশ্বৰ বসুমতাৰী, প্রাক্তন বিধায়ক বলেন মুছাহাৰীকে ধৰি দলীয় কার্যকর্তাসকল উপস্থিত থাকে ।
লগতে পঢ়ক:লাহৰীঘাট বজাৰত ভয়ংকৰ অগ্নিকাণ্ড
