গুৱাহাটী,26জুলাইঃ "আজিৰ তাৰিখত এনআৰচিৰ প্ৰক্ৰিয়াক লৈ এটা প্ৰতিযোগিতাৰ আৰম্ভ হৈছে । আবক্ষ মূৰ্তি প্ৰতিষ্ঠা হোৱাৰ প্ৰতিযোগিতা । এখন এন আৰ চি ওলাব লাগে আৰু তেতিয়া দ্ৰষ্টা-স্ৰষ্টাসকলৰ আবক্ষ মূৰ্তি স্থাপিত হ'ব । কিন্তু এখন শুদ্ধ এন আৰ চি প্ৰকাশ হোৱাটো নিবিচাৰে এই দ্ৰষ্টা-স্ৰষ্টা সকলৰ বহুতেই ।"- শুকুৰবাৰে সংবাদমেল সম্বোধন কৰি এই মন্তব্য বিজেপিৰ ৰাজ্যিক মুখপাত্ৰ বিজন মহাজনৰ ৷ এই সংবাদমেলত বিজন মহাজনে প্ৰতীক হাজেলাক সমালোচনাৰ লক্ষ্য কৰি লয় ৷ বিশেষকৈ প্ৰতীক হাজেলাৰ নেতৃত্বত চলি থকা এনআৰচিৰ কাম কাজসমূহ ভাৰতৰ আন ৰাজ্যৰ এনআৰচিৰ কামৰ সৈতে অমিল হোৱাৰ কথা ব্যক্ত কৰে । লগতে যি সময়ত অসমৰ ঘৰে ঘৰে গৈ সমল সংগ্ৰহ কৰিব লাগিছিল তেনে সময়ত প্ৰতীক হাজেলাৰ নেতৃত্বত ঘৰে ঘৰে গৈ সমল সংগ্ৰহ কৰা হোৱা নাই বুলিও বিজন মহাজনে সংবাদমেলত অভিযোগ উত্থাপন কৰে ।
ইপিনে উচ্চতম ন্যায়ালয়ে হুকুম নিদিয়াকৈ কেনেকৈ হাজেলাই 27 শতাংশ লোকৰ পুনৰীক্ষণ কৰিলে বুলি হাজেলাক সংবাদমেলৰ পৰায়ে প্ৰশ্নৰ উত্তৰ বিচাৰে বিজেপিৰ ৰাজ্যিক মুখপাত্ৰ বিজন মহাজনে ৷ আনহাতে অসমত এনআৰচিৰ প্ৰক্ৰিয়া সম্পূৰ্ণ কৰাৰ ক্ষেত্ৰত যিহেতু সময়সীমা নিৰ্ধাৰিত কৰা হৈছে গতিকে জালিয়াটি কৰাৰ সুযোগ থাকিব বুলিও সংবাদমেলত মত ব্যক্ত কৰে বিজেপিৰ ৰাজ্যিক মুখপাত্ৰগৰাকীয়ে ।
