গুৱাহাটী,6 ছেপ্টেম্বৰঃ শুকুৰবাৰে মহানগৰীৰ কৃষক মুক্তি সংগ্ৰাম সমিতিৰ মুখ্য কাৰ্যালয়ত এক সংবাদমেল সম্বোধন কৰি পুনৰ চুপাৰী চিণ্ডিকেটৰ বিৰুদ্ধে সৰৱ হ'ল অখিল গগৈ ৷ জালুকবাৰীত জব্দকৃত ট্ৰাকৰ ক্ষেত্ৰত তদন্তকাৰী আৰক্ষীয়ে দাখিল কৰা প্ৰতিবেদন ৰাজহুৱা কৰে গগৈয়ে ।
অখিল গগৈৰ স্পষ্ট অভিযোগ চৰকাৰ আৰু আৰক্ষীৰ পৃষ্ঠপোষকতাতে গঢ় লৈ উঠিছে এই ভয়ানক কাৰোবাৰ । আৰক্ষীক চুপাৰী মাফিয়াৰ নামসহ অভিযোগ দিয়াৰ পিচতো বৰ্তমানলৈ কিয় গোচৰ পঞ্জীয়ন নকৰিলে তাক লৈ প্ৰশ্ন অখিল গগৈৰ । আনহাতে চুপাৰীৰ এই ট্ৰাকৰ দ্বাৰাই অস্ত্ৰ শস্ত্ৰ সৰবৰাহ হোৱাৰো এক তথ্য আছে বুলি অভিযোগ কৰে গগৈয়ে । সকলো কথা আৰক্ষী তথা ৰাজ্যৰ সকলো বিভাগক জনোৱাৰ পিচতো দুৰ্নীতিৰ বিৰুদ্ধে শূণ্য সহনশীলতাৰ কথা কোৱা চৰকাৰে বৰ্তমানলৈ এটা চকুত লগা ধৰণে পদক্ষেপ নোলোৱাৰ অভিযোগ তুলি ক্ষোভ উজাৰে কৃষক নেতাগৰাকীয়ে । এই চিণ্ডিকেটৰ লগত অসম কৃষি বিপনন পৰিষদ জড়িত হৈ থকাৰ অভিযোগ উত্থাপন কৰে অখিল গগৈয়ে । ইফালে দীপাংকৰ দে', আব্দুল হান্নান আলী, অঞ্জন পাল আৰু ৰবিউল ইছলাম নামৰ চুপাৰী মাফিয়াই বৰ্তমানো গুৱাহাটীৰ মাজমজিয়াত চুপাৰীৰ বেহা চলাই আছে বুলি সংবাদমেলত মন্তব্য কৰে কৃষক নেতা অখিল গগৈয়ে । তাৰোপৰি অতিশীঘ্ৰে আৰক্ষী আৰু চৰকাৰে কোনো বিশেষ ব্যৱস্থা নল'লে প্ৰধানমন্ত্ৰীৰ নিৰাপত্তা উপদেষ্টা আৰু কেন্দ্ৰীয় বিত্তমন্ত্ৰীৰ কাষ চাপিব বুলি জনাই অখিল গগৈয়ে।
