নাগৰিকত্ব সংশোধনী আইন বাতিলৰ দাবীত মহানগৰীত প্ৰতিবাদ

মহানগৰীৰ নাৰেংগীত সোমবাৰে অসম জাতীয়তাবাদী যুৱ ছাত্ৰ পৰিষদে ৰূপায়ণ কৰে প্ৰতিবাদী কাৰ্যসূচী ৷ সংগঠনটোৱে নাগৰিকত্ব সংশোধনী আইন, EIA 2020 বাতিলৰ লগতে কৃষক নেতা অখিল গগৈৰ মুক্তিৰ দাবীত সাব্যস্ত কৰে প্ৰতিবাদ ৷

গুৱাহাটী,17 আগষ্ট: কৰ’ণা ভাইৰাছৰ বাবে বিগত চাৰি মাহে ৰাজ্যত স্তব্ধ হৈ ৰৈছিল নাগৰিকত্ব সংশোধনী আইন বিৰোধী প্ৰতিবাদ ৷ কিন্তু এই সংক্ৰমণ কিছু পৰিমাণে শাম কটাত পুনৰ গা কৰি উঠিছে এই আন্দোলনে ৷ বিগত কিছুদিনৰ পৰা ৰাজ্যৰ ভিন্ন প্ৰান্তত সদৌ অসম ছাত্ৰ সন্থা, কৃষক মুক্তি সংগ্ৰাম সমিতিৰ উপৰিও বিভিন্ন সৰু-বৰ সংগঠনে নাগৰিকত্ব সংশোধনী আইন বাতিলৰ দাবীত প্ৰতিবাদ সাব্যস্ত কৰা পৰিলক্ষিত হৈছে ৷ সেই একেই দাবীকে উত্থাপন কৰি ৰাজ্যত সোমবাৰৰ দিনটোত প্ৰতিবাদ সাব্যস্ত কৰে অসম জাতীয়তাবাদী যুৱ ছাত্ৰ পৰিষদে ৷

সংগঠনটোৰ মহানগৰ সমিতিয়ে এক প্ৰতিবাদী কাৰ্যসূচী ৰূপায়ন কৰি নাগৰিকত্ব সংশোধনী আইন বাতিলৰ লগতে EIA 2020 প্ৰত্যাহাৰ কৰাৰ লগতে কৃষক নেতা অখিল গগৈৰ মুক্তিৰ দাবী উত্থাপন কৰে ৷ সংগঠনটোৱে মহানগৰীৰ নাৰেংগীৰ কলংপাৰ বজাৰৰ সমীপত মানৱ শৃংখল প্ৰদৰ্শনেৰে প্ৰতিবাদী কাৰ্যসূচী ৰূপায়ণ কৰে ৷ প্ৰতিবাদকাৰীসকলে হাতে হাতে ফ্লেগ, বেনাৰ আদি লৈ চৰকাৰ বিৰোধী ধ্বনিৰে উত্তাল কৰি তোলে পৰিৱেশ ৷

লগতে চাওকঃ প্ৰাপ্য লাভৰ দাবীত মুছলপুৰত প্ৰতিবাদ