জাতীয় সাজপাৰ পিন্ধি বিদ্যালয়লৈ আহিল ছাত্ৰ-ছাত্ৰী , ক’ত !

পৰম্পৰাগত সাজ-পাৰেৰে বিদ্যালয় প্ৰাংগনত ৰঙালী বিহু উদযাপন টীয়ক জ্যোতি বিদ্যাপীঠৰ ৷

টীয়ক, 10 এপ্ৰিল : অসমীয়া সংস্কৃতিক দীৰ্ঘায়ু কৰি ৰাখিবলৈ আগবাঢ়ি আহিছে টীয়কৰ এখনৰ মাতৃভাষা মাধ্যমৰ বিদ্যালয় ৷ বিদ্যালয় প্ৰাংগনত বিহু পালন কৰি জাতীয় সাজ-পোছাকেৰে অসমীয়া সংস্কৃতিৰ ভেটি সুদৃঢ় কৰিবলৈ আগবাঢ়ি আহিল টীয়কৰ জ্যোতি বিদ্যাপীঠৰ ছাত্ৰ-ছাত্ৰী তথা শিক্ষক-অভিভাৱক সকলো ৷

শনিবাৰে বিদ্যালয়খনৰ খেলপথাৰত উলহ-মালহেৰে উদযাপন কৰা হয় মুকলি বিহু কাৰ্যসূচী ৷ বিদ্যালয়খনৰ নিয়মীয়া পাঠদানৰ পাছতে মুকলি হুঁচৰিৰে আৰম্ভ কৰা হয় ৰঙালী বিহুৰ কাৰ্যসূচী ৷ ছাত্ৰ ছাত্ৰীকে ধৰি বিদ্যালয়ৰ শিক্ষক,পৰিচালনা সমিতিৰ বিষয়ববীয়া আৰু অভিভাৱক সকলেও বিহু নাচি উদযাপন কৰে ৰঙালীৰ আনন্দ ৷ পশ্চিমীয়া সংস্কৃতিৰ কৰাল গ্ৰাসৰ পৰা জাতিটোক ৰক্ষাৰ উদ্দেশ্যে টীয়কৰ জ্যোতি বিদ্যাপীঠৰ এই কাৰ্যসূচী অত্যন্তই শলাগনীয় ৷