টীয়ক, 5 মে : ই টিভি ভাৰতত বাতৰি প্ৰকাশৰ পাছতেই যোৰহাটৰ শীতলীকৰণ ভৱন সন্দৰ্ভত প্ৰতিক্ৰিয়া প্ৰকাশ কৰে কৃষি বিপণন পৰিষদৰ অধ্যক্ষ পালিত কুমাৰ বৰাই ৷ দৰাচলতে কৃষি বিপণন পৰিষদৰ অধীনস্থ যোৰহাট জিলাৰ টীয়কৰ চটাইস্থিত শীতলীকৰণ ভৱনটো অব্যৱহৃত হৈ থকাৰ লগতে জৰাজীৰ্ণ ৰূপ ধাৰণ কৰিছে । ফলস্বৰূপে উক্ত বিষয় সন্দৰ্ভত বিপণন পৰিষদৰ অধ্যক্ষ পালিত কুমাৰ বৰাই নিজৰ প্ৰতিক্ৰিয়া ব্যক্ত কৰে ৷
অধ্যক্ষগৰাকীয়ে শীতলীকৰণ ভৱন সন্দৰ্ভত সাংবাদিকৰ আগত কয় যে , জিলাখনৰ কৃষকসকলে নিজৰ উৎপাদিত কৃষিজাত সামগ্ৰীসমূহ বৃহৎ শীতলীকৰণ ভৱনটোত সংৰক্ষণ কৰিব বিছৰা নাছিল । যাৰবাবে এই ভৱনটো এটা বণিক গোষ্ঠীক আবন্টন দিয়া হৈছিল । অৱশ্যে তেতিয়াও ভৱনটোৰ ২৫% স্থান স্থানীয় কৃষকৰ বাবে সংৰক্ষণ কৰা হৈছিল ৷
কিন্তু বণিক গোষ্ঠীটোৱে শীতলীকৰণ ভৱনটো কিছুদিন ব্যৱহাৰ কৰি বিদ্যুৎ যোগান অনিয়মীয়া হোৱাৰ বাবে সামগ্ৰীসমূহ নষ্ট হৈ যোৱাৰ অজুহাতত ভৱনটো ব্যৱহাৰৰ পৰা বিৰত থাকে বুলি জানিবলৈ দিয়ে অধ্যক্ষগৰাকীয়ে । অৱশ্যে লক্ ডাউন শিথিল কৰাৰ পাছত শীতলীকৰণ ভৱনটোৰ মেৰামতিৰ কাম হাতত ল'ব বুলি জনাই অধ্যক্ষগৰাকীয়ে । উল্লেখ্য যে, টীয়কত সংবাদ কৰ্মী,আৰক্ষী আৰু স্বাস্থ্য কৰ্মীসকলৰ মাজত মাস্ক,চেনিটাইজাৰ বিতৰণৰ বাবে আহিছিল বিপণন পৰিষদৰ অধ্যক্ষগৰাকী ৷
