যোৰহাট, 8 ছেপ্তেম্বৰ: যোৰহাটত সোমবাৰে মুখ্যমন্ত্ৰী সৰ্বানন্দ সোণোৱাল উপস্থিত হৈ উদ্বোধন কৰে ককিলামুখ-কাৰ্তিক চাপৰিৰ মাজৰ ফেৰী সেৱা ৷ সুদীৰ্ঘ 55 বছৰৰ অন্তত মুকলি কৰা এই সেৱাৰ জৰিয়তে উপকৃত হ’ব কাৰ্তিক চাপৰিবাসী ৰাইজ ৷ মুখ্যমন্ত্ৰীগৰাকীয়ে মহাপুৰুষ মাধৱদেৱৰ তিথিৰ দিনটোতে এই অনুষ্ঠানত উপস্থিত থাকিবলৈ পাই ধন্য মানে ৷ অঞ্চলটোত এতিয়াৰে পৰা এচবি ধলা নামৰ ফেৰীখনে যাতায়াত বহু পৰিমাণে সূচল কৰি তুলিব ৷
উল্লেখ্য যে,বিশেষকৈ যাদৱ পায়েঙৰ দৰে এগৰাকী মহান ব্যক্তিৰ অঞ্চলত এনে সেৱা আগবঢ়াবলৈ পাই সঁচাই আনন্দিত বুলি ব্যক্ত কৰে মুখ্যমন্ত্ৰীগৰাকীয়ে ৷ আভ্যন্তৰীণ জল পৰিৱহণ নিগম আৰু স্থানীয় ৰাইজৰ সহযোগত এই ফেৰী সেৱা চলাব লাগিব বুলিও গুৰুত্বপূৰ্ণ মন্তব্য আগবঢ়াই মুখ্যমন্ত্ৰী সোণোৱালে ।
উক্ত অনুষ্ঠানতে স্থানীয় ৰাইজ আৰু অৰণ্য মানৱ যাদৱ পায়েঙে খহনীয়া সন্দৰ্ভত মুখ্যমন্ত্ৰীগৰাকীৰ হাতত প্ৰদান কৰে এক স্মাৰকপত্ৰ ৷ সোমবাৰে মুকলি ফেৰী সেৱা সন্দৰ্ভত স্থানীয় ৰাইজে সন্তোষ প্ৰকাশ কৰে যদিও যন্ত্ৰচালিত ফেৰী চলাৰ ফলত ককিলামুখ অঞ্চলত পুনৰ খহনীয়া অধিক হোৱাৰ আশংকা প্ৰকাশ কৰিছে । সেয়ে এই খহনীয়া ৰোধৰ ক্ষেত্ৰত বিহিত ব্যৱস্থা গ্ৰহণ কৰিবলৈ মুখ্যমন্ত্ৰীৰ হাতত স্মাৰকপত্ৰ দাখিল কৰে ৰাইজে ৷ আনহাতে,যোৰহাটৰ সংবাদ মাধ্যমক বিশেষভাৱে শলাগ জনাই মুখ্যমন্ত্ৰীগৰাকীয়ে । কিয়নো সংবাদ মাধ্যমৰ বাবেহে ককিলামুখ অঞ্চলৰ বাতৰিসমূহ বিতংভাৱে প্ৰচাৰ হোৱা মুখ্যমন্ত্ৰীৰ দৃষ্টিগোচৰ হৈছিল ৷
লগতে চাওকঃ হৰিণৰ শিং আৰু বন্দুকসহ আটক চোৰাং চিকাৰী
