মৰিয়নী,30 অক্টোবৰঃ যোৰহাটৰ মৰিয়নীৰ ভোগদৈ নৈত SDRF বাহিনীৰ জোৰদাৰ অভিযান। বৰ্তমানেও উদ্ধাৰ হোৱা নাই সলিল সমাধি ঘটা কিশোৰৰ। মৰিয়নীৰ 2 নম্বৰ ৱাৰ্ড বিৰলা কলনীৰ নিবাসী ৰামা ৰাওৰ ১৫বছৰীয়া পুত্ৰ গোবিন্দ ৰাও তেওঁৰ দুজন সমনীয়াৰ লগত মঙলবাৰে ভোগদৈ নৈ লৈ গৈছিল। নৈত গা ধুই খেলি থকা অৱস্থাত গোবিন্দ ৰাওৰ সলিল সমাধি ঘটিছিল। স্থানীয় লোকে এই সন্দৰ্ভত মৰিয়নী আৰক্ষীক অৱগত কৰিছিল যদিও ঘটনা সংঘটিত হোৱাৰ বহু সময়ৰ পাছতো কিশোৰজনক উদ্ধাৰৰ বাবে আৰক্ষী বা প্ৰশাসনে কোনোধৰণৰ প্ৰদক্ষেপ নোলোৱাত স্থানীয় ৰাইজে পথ অৱৰোধ কৰি উত্তপ্ত পৰিস্থিতিৰ সৃষ্টি কৰিছিল।
ইয়াৰ পাছতে যোৰহাটৰ SDRF বাহিনী ঘটনাস্থলীত উপস্থিত হৈ কিশোৰজনৰ সন্ধানত ভোগদৈ নৈত নামে যদিও নিশা হোৱাত তেওঁলোকৰ অভিযান সিমানতে স্থগিত ৰাখিবলগীয়া হয়। পুনৰ বুধবাৰে পুৱাৰে পৰা SDRFৰ কেইবাজনো ডুবাৰোৱে ভোগদৈ নৈত কিশোৰজনৰ সন্ধানত উদ্ধাৰ অভিযানত নামে যদিও এই পৰ্যন্ত কোনো সন্ধান লাভ কৰিবলৈ সক্ষম হোৱা নাই।
লগতে চাওকঃ হঠাৎ অসুস্থ কেন্দ্ৰীয় মন্ত্ৰী ৰামেশ্বৰ তেলী, ICUত ভৰ্তি