উৰুকাৰ নিশা ভেলাঘৰত যোৰহাটৰ এখন গাঁৱৰ ৰাইজৰ অনশন

যোৰহাটৰ উত্তৰ পশ্চিম প্ৰান্তত থকা কৃষিপ্ৰধান কুহুমযোগমীয়া গাঁৱৰ ৰাইজে উৰুকাৰ নিশা গ্ৰহণ কৰিছে অনশন ৷ নাগৰিকত্ব সংশোধনী আইন বাতিল আৰু কৃষক নেতা অখিল গগৈকে ধৰি সকলো কাৰাবন্দীক মুক্তিৰ দাবীত এই প্ৰতিবাদী সিদ্ধান্ত গাঁওখনৰ ৰাইজৰ ৷

যোৰহাট, 14 অক্টোবৰঃ ৰাজ্যৰ চৌপাশে বাপতিসাহোন ভোগালীৰ উৎসাহ ৷ পৰম্পৰা ৰক্ষা কৰি উৰুকাৰ নিশা ভেলাঘৰৰ কাষত হেঁপাহেৰে এসাজ খাইছে সকলোৱে একেলগে ৷ কিন্তু যোৰহাটৰ এখন গাঁৱৰ ৰাইজৰ মাজত নাই ভোগালীৰ ভোগ ৷ ভেলাঘৰৰ কাষত ভোজ ভাতৰ পৰিৱৰ্তে উৰুকাৰ নিশা গঞা ৰাইজে গ্ৰহণ কৰিছে অনশন ৷ কাৰণ এটাই, নাগৰিকত্ব সংশোধনী আইন ৷

যোৰহাটৰ উত্তৰ পশ্চিম প্ৰান্তত থকা কৃষিপ্ৰধান কুহুমযোগমীয়া গাঁৱৰ ৰাইজে এনেদৰে একত্ৰিতভাৱে চৰকাৰ বিৰোধী শ্লগানেৰে কঁপাই তুলিলে উৰুকাৰ নিশা ৷ জুইৰ উত্তাপত জ্বলিল নাগৰিকত্ব সংশোধনী আইন ৷ সমগ্ৰ গাঁওখনৰ পুৰুষ-মহিলা, যুৱক-যুৱতীৰ পৰা বৃদ্ধা বণিতালৈকে সকলোৱে অংশগ্ৰহণ কৰিছে অনশনত ৷ উৰুকাৰ নিশাৰ পৰা বিহুৰ দিনা দিনৰ 12 বজালৈকে অনশন চলাই যাব ৰাইজে ৷ লগতে ভেলাঘৰৰ প্ৰাংগনৰ পৰাই কৃষক নেতা অখিল গগৈক মাওবাদীৰ গোচৰত গ্ৰেপ্তাৰ কৰা কাৰ্যক ধিক্কাৰ দি অতিশীঘ্ৰে মুক্তিৰো দাবী তুলিলে যুৱকসকলে ৷

এতিয়া প্ৰশ্ন হয় , বাপতিসাহোন ভোগালীৰ ভোগ কাঢ়ি নি উৰুকাৰ নিশা অনশন কৰিবলৈ বাধ্য কৰোৱা এইসকল ৰাইজৰ মুখামুখি হ'ব পাৰিবনে কেন্দ্ৰীয় অথবা ৰাজ্য চৰকাৰ ৷ নে মাঘৰ মেজিৰ উত্তাপত সংকল্প লোৱা অসমীয়া ৰাইজৰ ক্ষোভৰ বহিঃপ্ৰকাশ ঘটিব বেলটত তাৰ বাবে বাট চাব লাগিব অনাগত সময়লৈ ৷

লগতে পঢ়ক , ভোগালীৰ উছাহত মতলীয়া সমগ্ৰ ৰাজ্য