মৰিয়নি,15ছেপ্তেম্বৰঃকৰ'ণা আতংকৰ মাজতে মঙলবাৰে অনুষ্টুপীয়াকৈ উদযাপন কৰা হয় মৰিয়নি প্ৰেছ ক্লাৱৰ 24 সংখ্যক প্ৰতিষ্ঠা দিৱস ৷ পতাকা উত্তোলনেৰে কাৰ্যসূচী আৰম্ভ কৰে মৰিয়নি প্ৰেছ ক্লাৱৰ প্ৰাক্তন সভাপতি তথা প্ৰাক্তন সম্পাদক মনোজ কুমাৰ শৰ্মাই । ইয়াৰ পিছতে প্ৰয়াত সাংবাদিকৰ প্ৰতি শ্ৰদ্ধাঞ্জলি জ্ঞাপন কৰে কৃতী শিক্ষক, সমাজকৰ্মী নগেন গগৈয়ে । প্ৰেছ ক্লাৱৰ সভাকক্ষত সভাপতি জীৱন চন্দ্ৰ দত্তৰ সভাপতিত্বত চমু মত বিনিময় সভা অনুষ্ঠিত হোৱাৰ লগতে মৰিয়নি প্ৰেছ ক্লাৱৰ আগন্তুক ৰূপালী জয়ন্তী সন্দৰ্ভতো আলোচনা কৰা হয় । সভাত প্ৰেছ ক্লাৱৰ প্ৰতিষ্ঠাপক সভাপতি ৰঞ্জিত গোহাঁই বৰুৱা, মৰিয়নি ইলেক্ট্ৰ'নিক মিডিয়া সন্থাৰ সভাপতি চক্ৰসেন গগৈৰ লগতে বহুকেইগৰাকী সাংবাদিকে অংশগ্ৰহণ কৰে ৷
আনহাতে,উক্ত সভাতে ২০২০ বৰ্ষৰ ৰাজ্যিক কৃতী শিক্ষকৰ বঁটাপ্ৰাপক, সমাজকৰ্মী নগেন গগৈক মৰিয়নি প্ৰেছ ক্লাৱ আৰু মৰিয়নি ইলেক্ট্ৰ'নিক মিডিয়া সন্থাই গামোচা, চেলেং চাদৰেৰে সম্বৰ্ধনা জনায় ৷ সম্বৰ্ধনা গ্ৰহণ কৰি কৃতী শিক্ষক নগেন গগৈয়ে সংবাদ মাধ্যমৰ বাবেই তেওঁ এই স্বীকৃতি লাভ কৰিবলৈ সক্ষম হয় বুলি উল্লেখ কৰে । তদুপৰি সংবাদ মাধ্যম যিমানেই সমালোচনাৰ সন্মুখীন নহওক কিয় ইয়াক কোনেও এৰাই চলিব নোৱাৰে বুলিও তাৎপৰ্যপূৰ্ণ মন্তব্য কৰে বিশিষ্ট শিক্ষকজনে ।
