হোজাই, 20 এপ্ৰিল : হোজাইত মঙলবাৰে পুৱাৰে পৰা সন্ধানহীন হৈ আছে এগৰাকী 10 বছৰীয়া নাবালিকা (Minor girl goes missing from Hojai) ৷ সন্ধানহীন হোৱা নাবালিকাগৰাকী হোজাই জিলাৰ পূৱ উদালীৰ ৰাম সিং গাঁৱৰ ৰুজিনা আখতাৰ বুলি জানিব পৰা গৈছে ৷ এই ঘটনাক কেন্দ্ৰ কৰি অঞ্চলটোত সৃষ্টি হৈছে তীব্ৰ চাঞ্চল্য ৷
সন্ধানহীন হোৱা নাবালিকাগৰাকীৰ আত্মীয়ই প্ৰকাশ কৰা অনুসৰি, মঙলবাৰে পুৱা প্ৰায় 6 বজাত ঘৰৰ পৰা মাদ্ৰাছালৈ বুলি ওলাই গৈছিল ৰুজিনা ৷ তাৰ পাচত সমনীয়াৰ সৈতে প্ৰায় 8-9 বজাত ঘৰলৈ বুলি ঘূৰি অহাৰ পথতে আদবাটত সন্ধানহীন হৈ পৰে নাবালিকা গৰাকী ৷ তাৰপাচতেই সন্ধানহীন নাবালিকা গৰাকীৰ পৰিয়ালত সৃষ্টি হয় হাহাকাৰ পৰিস্থিতি ৷
বহু সময়লৈকে পৰিয়ালৰ লোকে নাবালিকাগৰাকীৰ আত্মীয়ৰ ঘৰত বিচাৰ-খোঁচাৰ কৰে ৷ কিন্তু কোনো সন্ধান উলিয়াব নোৱাৰিলে পৰিয়ালৰ লোকে (Missing minor girl case) ৷ অৱশেষত উপায়ন্তৰ হৈ ভুক্তভোগী পৰিয়ালটোৱে কাষ চাপে আৰক্ষীৰ ৷
মঙলবাৰে নিশাই ৰুজিনা আখতাৰৰ সন্ধানহীন হোৱাৰ সন্দৰ্ভত উদালী আৰক্ষী চকীত পৰিয়ালৰ লোকে দাখিল কৰে এজাহাৰ ৷ এই এজাহাৰৰ ভিত্তিতেই উদালী আৰক্ষীয়ে আৰম্ভ কৰে তদন্ত ৷ সন্ধানহীন হোৱা ৰুজিনাৰ বিষয়ে যদিহে কোনো সদাশয় ব্যক্তিয়ে শুংসূত্ৰ লাভ কৰে, তেন্তে স্থানীয় আৰক্ষী নাইবা 81378-21664 নম্বৰত যোগাযোগ কৰিবলৈ পৰিয়ালৰ লোকে আহ্বান জনাইছে ৷
লগতে পঢ়ক : Minor girl rescue in kolkata : কলকাতাত উদ্ধাৰ বৰপেটাৰোডৰ সন্ধানহীন কিশোৰী
