গোলাঘাট, 3 ফেব্ৰুৱাৰীঃ গোলাঘাটৰ নুমলীগড়ৰ দুজোপা বিশাল গছে এতিয়া আকৰ্ষিত কৰিছে বহু পথচাৰীক ৷ এক দীৰ্ঘদিনীয়া ইতিহাস বহন কৰি আহিছে দুই ভেলৌ গছে । কাৰণ দশক-দশক ধৰি এই গছ দুজোপাতেই বাহ লৈছে অসংখ্য মৌ মাখিয়ে ।
39 নং ৰাষ্ট্ৰীয় ঘাইপথৰ কাষতে আছে এই ভেলৌ গছ দুজোপা । দেওপাহাৰত অৱস্থিত এই গছ দুজোপাত ওলমি থকা শ-শ মৌ বাহে মনোমোহা কৰি তুলিছে সমগ্ৰ পৰিৱেশ । প্ৰায় 80 বছৰীয়া গছ দুজোপাত থকা মৌ মাখিৰ গুণ গুণনিয়ে সুশোভিত কৰি ৰাখে সমগ্ৰ দেওপাহাৰ ।
ইপিনে মৌপিয়া চৰাইয়ে মৌ পান কৰিবলৈ মৌচাক সমূহত সঘনাই আক্ৰমণ কৰাৰ ফলত মৌচাক সমূহ তলত পৰি ৰয় । ফলত বহু পথচাৰীৰ মাজত মৌচাকৰ সোৱাদ ল'বলৈ হেতা-ওপৰা লাগে ৷
শাওন মাহৰ পৰাই মৌ মাখিয়ে ফুলৰ ৰস সঞ্চয় কৰি সাজি উলিয়াই মৌ-চাক । শাওন মাহৰ পৰা ফাগুনলৈকে ভেলৌ গছ দুজোপাত শ-শ মৌ মাখিয়ে বাহ সাজি সুশোভিত কৰি ৰাখে পৰিৱেশ । দশক দশক ধৰি এইদৰে ইতিহাস বহন কৰি আহিছে এই ভেলৌ গছ দুজোপাই ।
