গোলাঘাট, 9 নৱেম্বৰ : দুখীয়াৰ বাবে চৰকাৰে দিয়া চাউল যাতে কোনো সুলভ মূল্যৰ দোকানীয়ে আত্মসাৎ কৰিব নোৱাৰে তাৰ বাবে কঠোৰ হোৱাৰ ইংগিত দিছিল মুখ্যমন্ত্ৰীয়ে ৷ কিন্তু বৰ্তমানেও ৰাজ্যত বগা চাউলৰ ক’লা বেহা অব্যাহত আছে ৷
দুখীয়া ৰাইজলৈ চৰকাৰে যোগান ধৰা চাউল খালে এজেণ্টে । যাৰ বাবে গোলাঘাটৰ পশ্চিম ঘিলাধাৰী সমবায় সমিতি লিমিটেডৰ কাৰ্যলয়ত উত্তপ্ত কৰি তোলে ৰাইজে ৷ হিতাধিকাৰীৰ অভিযোগ অনুসৰি, ‘‘এজেণ্ট মোহন বৰাই হিতাধিকাৰীক 2022 চনৰ চেপ্তেম্বৰ আৰু 2023ৰ মে আৰু জুন মাহৰ চাউল পোৱা নাই ৷ তিনি মাহত মুঠ 90 কুইন্টল চাউল ক’লা বজাৰত বিক্ৰী কৰিছে এজেন্ট বৰাই ৷ যোগান বিভাগে বৰাৰ দোকান বন্ধও কৰি দিছিল ৷ কিন্তু আকৌ সুলভ মূল্যৰ দোকান খোলাৰ অধিকাৰ দিলে বিভাগীয় কৰ্তৃপক্ষই ৷’’
সেয়ে ৰাইজে গোলাঘাটৰ পশ্চিম ঘিলাধাৰী সমবায় সমিতি লিমিটেডৰ কাৰ্যালয় ঘেৰাও কৰে । দুখীয়া ৰাইজৰ চাউল খোৱা এজেণ্টৰ দোকান বন্ধ কৰক । এজেণ্ট মোহন বৰা দোকানৰ চাউল নাখাও আদিৰ দাবীৰে প্ৰতিবাদ সাব্যস্ত কৰে ৰাইজে ৷
ইফালে ৰাইজৰ প্ৰতিবাদ দেখি ঘনটাস্থলীৰ পৰা পলায়নৰ চেষ্টা চলাই মোহন বৰাই । আনহাতে হিতাধিকাৰীক চাউল বিতৰণ নকৰাৰ সন্দৰ্ভত সাংবাদিকে কৰা প্ৰশ্নৰ উত্তৰত কয়, ‘‘মই অকলশৰীয়া ৷ সময়ৰ অভাৱ হৈছিল ৷ সেয়ে মই চাউলখিনি দিব পৰা নাছিলোঁ ৷’’
ইয়াৰ পাচত যোগান বিভাগে কি ব্যৱস্থা লয় সেয়া সময়ে ক’ব । পিছে ৰাইজৰ প্ৰশ্ন, যোগান বিভাগে কাৰ কি অংকত এজেন্ট মোহন বৰাক পুনৰ দোকান চলোৱাৰ অনুমতি দিলে !
লগতে পঢ়ক:Road Accident: নতুনকৈ বাইক ক্ৰয় কৰি ঘৰ নাপালেহি দুই যুৱক
