বোকাখাত , 1 অক্টোবৰ : 2021-22 পৰ্যটনৰ বাবে মুকলি হ'ল বিশ্ব ঐতিহ্য ক্ষেত্ৰ কাজিৰঙা ৰাষ্ট্ৰীয় উদ্যান ৷ মুখ্যমন্ত্ৰী ড৹ হিমন্ত বিশ্ব শৰ্মাৰ ঘোষণামৰ্মে শুকুৰবাৰে ৰাষ্ট্ৰীয় উদ্যানখন পুনৰ আনুষ্ঠানিকভাৱে পৰ্যটকৰ বাবে মুকলি কৰি দিয়া হয় ৷
বিগত 22 ছেপ্টেম্বৰত বোকাখাত গঁড়ৰ খৰ্গ দাহন অনুষ্ঠানত উপস্থিত থাকি ৰাজ্যৰ মুখ্যমন্ত্ৰী ড৹ হিমন্ত বিশ্ব শৰ্মাই কাজিৰঙা ৰাষ্ট্ৰীয় উদ্যান পৰ্যটকৰ বাবে মুকলি কৰাৰ কথা ঘোষণা কৰিছিল ৷ সেইমৰ্মে, শুকুৰবাৰৰ পৰা কাজিৰঙাৰ কঁহৰা আৰু বাগৰি বনাঞ্চলৰ 30 শতাংশ অঞ্চল মুকলি কৰি দিয়া হৈছে ৷ ৰাজ্য চৰকাৰৰ এই পদক্ষেপৰ পাচতে কাজিৰঙাৰ পৰ্যটন ক্ষেত্ৰৰ সৈতে জড়িত লোকসকল উৎফুল্লিত হৈ পৰা পৰিলক্ষিত হৈছে ৷
উল্লেখ্য যে, কঁহৰা বনাঞ্চলৰ প্ৰায় 9 কিঃমিঃ আৰু বাগৰি বনাঞ্চলৰ 8 কিঃমিঃ জিপ চাফাৰীৰ বাবে মুকলি কৰি দিয়া হৈছে ।
বনমন্ত্ৰী পৰিমল শুক্লবৈদ্যই বুধবাৰে উদ্যানখনৰ মূল প্ৰৱেশদ্বাৰ মুকলি কৰে ৷ কৃষিমন্ত্ৰী অতুল বৰা, গোলাঘাট জিলাৰ উপায়ুক্ত, পূৱ-অসম বন্যপ্রাণী প্ৰাধিকাৰী ৰমেশ চন্দ্ৰ গগৈ আৰু বোকাখাতৰ মহকুমাধিপতিয়ে বনমন্ত্ৰীগৰাকীক সংগ দিয়ে ৷
লগতে পঢ়ক : গোলাঘাটত উৎকোচ লোৱাৰ অভিযোগত গ্ৰেপ্তাৰ আৰক্ষী উপ-পৰিদৰ্শক
