ডিমা হাছাও 11 জুন : ডিমা হাছাও জিলাৰ হাডিংমা হাইস্কুল, খেপৰে হাইস্কুল, লেইৰি হাইস্কুল, চিমথুলুং হাইস্কুল আৰু খাৰটং হাইস্কুলৰ পৰা হাইস্কুল শিক্ষান্ত পৰীক্ষাত এজনো ছাত্ৰ-ছাত্ৰী উত্তীৰ্ণ হোৱা নাই । যাৰ বাবে চৰকাৰে বন্ধ কৰাৰ নিৰ্দেশ দিছে এই পাঁচখন বিদ্যালয় ৷ কিন্তু এই সিদ্ধান্তৰ বিৰোধিতা কৰি হালালি প্ৰগ্ৰেচীভ ওয়েলফেয়াৰ চচাইটিৰ সভাপতি দিলীপ নুনিচাই কয় যে, ডিমা হাছাও জিলাৰ এই স্কুল কেইখন হৈছে অত্যন্ত ভিতৰুৱা এলেকাত ৷ যাৰ বাবে শিক্ষা বিভাগ আৰু ৰাজ্য চৰকাৰে এই এলেকা সমূহৰ ভৌগোলিক পৰিস্থিতি অধ্যয়ন কৰাতো জৰুৰী । দিলীপ নুনিচাই কয় যে, এই স্কুল কেইখন জিলাখনৰ পিচপৰা অঞ্চলত থকাৰ বাবে স্কুল সমূহ পৰিকাঠামোগতভাবে উন্নত নহয় । ইয়াৰ উপৰি এই অঞ্চল সমূহত যোৱাৰ বাবে ঘাইপথ নাই ।
শিক্ষক সকলৰ থকাৰ বাবে নাই কোনো চৰকাৰী আবাস । স্কুল সমূহত নাই শিক্ষক। যাৰ বাবে ৰাজ্য চৰকাৰক এইলৈ সুচিন্তা কৰা উচিত বুলি মন্তব্য কৰে দিলীপ নুনিচাই ৷ এই 5 খন স্কুল বন্ধ কৰাৰ সিদ্ধান্ত সলনি কৰি এই স্কুল সমূহৰ পৰিকাঠামোগত উন্নয়নৰ দিশটো ঠিক কৰাৰ বাবে ৰাজ্য চৰকাৰ আৰু উত্তৰ কাছাৰ পাৰ্বত্য স্বায়ত্ব শাসিত পৰিসদ কৰ্তৃপক্ষক নুনিচাই আহ্বান জনায়।
লগতে পঢ়ক : চন্দ্ৰমোহন পাটোৱাৰীৰ বিৰুদ্ধে ক্ষোভত জ্বলিছে বাঘজানৰ আশ্ৰয় শিবিৰ
