আন্দোলন নহয়, কৃষি বিপ্লৱেৰে উজ্বলিছে টিংখাঙৰ মহিলা

কচু খেতিৰে স্বাৱলম্বিতাৰ মুখ দেখিছে টিংখাঙৰ একাংশ মহিলাই ৷ যি সময়ত মাইক্ৰ'ফাইনেঞ্চৰ ঋণ লৈ বহু মহিলা সৰ্বস্ৰান্ত হ'বলগীয়া হৈছে, তেনে সময়তে বুঢ়ীদিহিঙৰ পাৰৰ একাংশ উদ্যমী মহিলাৰ প্ৰচেষ্টাই বহুতকে প্ৰেৰণা যোগাবলৈ সক্ষম হৈছে ।

টিংখাং, 5 আগষ্ট : বুঢ়ীদিহিঙৰ পাৰত কৃষি বিপ্লৱেৰে উজ্বলিছে টিংখাঙৰ একাংশ মহিলা ৷ বিভিন্ন সময়ত বিভিন্নজনে পশু, হাঁহ কুকুৰা পালনেৰে স্বাৱলম্বিতাৰ পথ বাচি লোৱা পৰিলক্ষিত হৈছে ৷ এইবাৰ কচু খেতিৰে স্বাৱলম্বিতাৰ মুখ দেখিছে টিংখাঙৰ লেঙেৰী পঞ্চায়তৰ অন্তৰ্গত শলগুৰি গাঁৱৰ জোনালী আত্মসহায়ক গোটৰ মহিলাসকলে ৷

বুঢ়ীদিহিঙৰ পাৰৰ প্ৰায় 10 বিঘা সাৰুৱা কৃষিভূমিত কচু খেতি কৰি বিগত বছৰবোৰত 40-50 কুইণ্টল ফচল উৎপাদন কৰিবলৈ সক্ষম হৈছে মহিলাসকল ৷ বছৰি প্ৰায় 4 লাখ টকা উপাৰ্জন কৰি আহিছে জোনালী আত্মসহায়ক গোটে । কচু খেতিৰ সমানুপাতে মহিলা গোটটোৱে গাহৰি ফাৰ্ম আৰু মীন পালনৰ যোগেদিও যথেষ্ট পৰিমাণৰ ধন উপাৰ্জন কৰিবলৈ সক্ষম হৈছে ।

যিসময়ত মাইক্ৰ'ফাইনেঞ্চৰ ঋণ লৈ বহু মহিলা সৰ্বস্ৰান্ত হ'বলগীয়া হৈছে, তেনে সময়তে বুঢ়ীদিহিঙৰ পাৰৰ এইসকল উদ্যমী মহিলাৰ প্ৰচেষ্টাই বহুতকে প্ৰেৰণা যোগাবলৈ সক্ষম হৈছে । ৰাজ্যৰ ভিন্ন প্ৰান্তৰ লোকক লক ডাউনে জুৰুলা কৰাৰ সময়তে টিংখাঙৰ এইসকল মহিলাই অৰ্থনৈতিক বিপ্লৱ গঢ়ি তোলাৰ চেষ্টাত ব্ৰতী হৈছে ৷

লগতে পঢ়ক: পথ পকীকৰণৰ দাবীত ৰাজপথত ৰঙিয়াৰ বৰমুৰাৰ ৰাইজ