ডিব্ৰুগড়, 12 জানুৱাৰীঃ হাজাৰ প্ৰতিবাদকো নেওচি যোৱা 10 জানুৱাৰী 2020ৰ পৰা সমগ্ৰ দেশতে বলৱৎ হৈছে নাগৰিকত্ব সংশোধনী আইন 2019 ৷ কেন্দ্ৰীয় গৃহ মন্ত্ৰালয়ে এক ৰাজপত্ৰিত অধিসূচনা জাৰি কৰি প্ৰকাশ কৰিছিল এই কথা ৷
কিন্তু দেশ তথা ৰাজ্যত আজিও তীব্ৰতৰ নাগৰিকত্ব আইন বিৰোধী প্ৰতিবাদ ৷ ঠায়ে ঠায়ে অভিনৱ প্ৰতিবাদৰে উত্তাল সমগ্ৰ ৰাজ্য ৷ এইবাৰ ৰাজপথৰ আন্দোলনৰ লগতে পাচিয়ে পাচিয়ে ধান লৈ ৰাজপথলৈ ওলাই আহিল নাহৰকটীয়া চাচনীৰ এদল ৰাইজ ৷ ধান বিক্ৰী কৰি পোৱা ধনেৰে ন্যায়িক যুঁজখনৰ বাবেও সাজু এই চাচনীবাসী ৷ আনকি প্ৰয়োজনত মূৰৰ ঘাম মাটিত পেলাই বছৰটোৰ বাবে চপোৱা সোণগুটি কেইটাও জাতি ৰক্ষাৰ বাবে আগবঢ়াই দিবলৈ সাজু হৈছে চাচনীবাসী ৷ এখন বিশেষ বেনাৰেৰে অভিনৱ প্ৰতিবাদ গাঁৱবাসীৰ ৷ দেশৰ সৰ্বোচ্চ ন্যায়ালয়ৰ বিবেচনাৰ আঁওতাত এতিয়া এই সংশোধিত নাগৰিকত্ব আইন ৷ এই আইন বাতিলৰ দাবীত ৰাজ্যৰ বহুসংখ্যক দল সংগঠনে ন্যায়ালয়ত তৰা এই ন্যায়িক যুঁজখন অবিৰামভাৱে চলাই যাবলৈ সহায়ৰ হাত আগবঢ়াবলৈ ওলাই আহিছে বৃহত্তৰ চাচনীবাসী।
আনহাতে গাঁওবাসীয়ে সংগ্ৰহ কৰা এই সোণগুটি অহা 18 জানুৱাৰীত চাচনী মেৰবিলত চাচনীবাসীয়ে আয়োজন কৰা সিংহনাদত ৰাইজৰ চকুৰ সন্মুখতে বিক্ৰী কৰি পোৱা সেই ধন ন্যায়িক যুজঁৰ বাবে প্ৰদান কৰিব আছুৰ সাধাৰণ সম্পাদক লুৰিণজ্যোতি গগৈৰ হাতত ৷ ইফালে চাচনীবাসীৰ এই অভিনৱ পদক্ষেপক সকলোৱে শলাগ লোৱাৰ লগতে চাচনীবাসীৰ হুংকাৰ 'কা' আমি নুবুজোঁ, 'কা' আমি নামানোঁ লাগিলে তেজ দিম কিন্তু এই আইন গৃহীত কৰিবলৈ দিয়া নহ’ব।
আৰু পঢ়কঃৰাজ্যজুৰি আছুৰ নেতৃত্বত জোঁৰ সমদল
