ডিব্ৰুগড়, ১৯ জানুৱাৰী : ৰাজ্যত ক'ভিড পৰিস্থিতিয়ে ভয়ংকৰ ৰূপ ধাৰণ কৰিছে (Covid situation in Assam) । ৰাজ্যত প্ৰথম আৰু দ্বিতীয় ঢৌত যি ধৰণে ক'ভিড সংক্ৰমণ হৈছিল, তৃতীয় ঢৌ তাতকৈও ভয়ানক হৈ উঠিছে । পূৰ্বৰ সকলো অভিলেখ ভংগ কৰি ৰাজ্যত দৈনিক আক্ৰান্তৰ সংখ্যা ৮০০০ অতিক্ৰম কৰিছে । যাৰ বাবে শংকিত হৈছে ৰাজ্যবাসী ।
ইতিমধ্যে স্বাস্থ্য বিভাগে ক'ভিড এছঅ'পি (SOP) প্ৰকাশ কৰাৰ সমান্তৰালকৈ জিলাসমূহেও কঠোৰ পদক্ষেপ গ্ৰহণ কৰিছে । ৰাজ্যৰ কিছুমান জিলাত ক'ভিডৰ সংক্ৰমণ বৃদ্ধি হৈছে । তাৰ ভিতৰত ডিব্ৰুগড় জিলা অন্যতম । জিলাখনত ক'ভিড আক্ৰান্তৰ সংখ্যা উদ্বেগজনকভাৱে বৃদ্ধি পোৱাৰ পৰিপ্ৰেক্ষিতত ডিব্ৰুগড় জিলা প্ৰশাসনে জৰুৰী নিৰ্দেশনা জাৰি কৰিছে (Covid cases increased in Dibrugarh)।
নিৰ্দেশনা অনুসৰি জিলাখনৰ সকলো দোকান আৰু ব্যৱসায়িক প্ৰতিষ্ঠান নিশা ৯ বজাৰ লগে লগে বন্ধ কৰিব লাগিব । সামাজিক দূৰত্ব মানি সকলো দোকানত কেৱল মাত্ৰ পাঁচজন লোকেহে এবাৰত প্ৰৱেশ কৰিব পাৰিব । সকলো ৰেষ্টুৰেণ্ট, ধাবা আৰু হোটেলত দুটা ক'ভিড প্ৰতিষেধক গ্ৰহণ কৰা গ্ৰাহকেহে যাব পাৰিব । মাস্ক পৰিধান কৰা গ্ৰাহককহে দোকানীয়ে সামগ্ৰী প্ৰদান কৰিব পাৰিব ।
প্ৰশাসনৰ এই নিৰ্দেশনা অমান্য কৰিলে দুৰ্যোগ প্ৰশমন ব্যৱস্থাপনা আইনৰ অধীনত যিকোনো ব্যক্তিকে জৰুৰীভাৱে আইনগতভাৱে ব্যৱস্থা ল'বলৈ প্ৰশাসন সাজু থাকিব বুলি নিৰ্দেশনাত প্ৰকাশ কৰা হৈছে । সোমবাৰৰ দিনটোলৈকে সমগ্ৰ ডিব্ৰুগড় জিলাত ক'ভিডত ৫০১ জনৰ দেহত ধৰা পৰিছিল । ইফালে ডিব্ৰুগড় জিলা আৰু সত্ৰ ন্যায়াধীশ আদালত আৰু কাৰ্যালয়ৰ দণ্ডাধীশ কৰ্মচাৰী অধিবক্তাসহ প্ৰায় ৪৬ জন লোকৰ দেহত ক'ভিড-১৯ ভাইৰাছৰ অৱস্থিতি ধৰা পৰিছে ।
লগতে পঢ়ক : ক'ভিড পৰীক্ষা আৰু চিকিৎসাৰ ক্ষেত্ৰত স্বাস্থ্য বিভাগৰ সংশোধিত নিৰ্দেশনা জাৰী
