মৰাণ,25 ফেব্ৰুৱাৰী: সমগ্ৰ ৰাজ্যৰ লগতে বুধবাৰে মৰাণতো অসম আন্দোলনৰ শ্বহীদ মনেশ্বৰ গোঁহাই আৰু শ্বহীদ ভলোকা গোঁহাইৰ স্মৃতিত শ্বহীদ দিৱসৰ আয়োজন কৰা হয় ৷ মৰাণ আঞ্চলিক ছাত্ৰ সন্থাৰ উদ্যোগত আৰু গজপুৰীয়া প্ৰাথমিক গোট ছাত্ৰ সন্থাৰ সহযোগত মৰাণত অসম আন্দোলনৰ শ্বহীদ দুগৰাকীৰ স্মৰণ কৰা হয় ৷
মৰাণৰ ৰছীপথাৰত শ্বহীদ ভলোকা গোহাঁই আৰু মনেশ্বৰ গোঁহাইৰ শ্বহীদ বেদীত অনুষ্ঠিত এই শ্বহীদ দিৱসত আছুৰ পতাকা উত্তোলনেৰে কাৰ্যসূচী আৰম্ভ হয় ৷ শ্বহীদদ্বয়ৰ বেদীত বন্তি প্ৰজ্বলন কৰি আছুৰ মৰাণ আঞ্চলিক সমিতিৰ সম্পাদক ভাস্কৰ বৰুৱাই অসম আন্দোলনৰ 855 গৰাকী শ্বহীদক স্মৰণ কৰে ৷
শ্বহীদ বেদীত শপত লৈ আছুৰ সদস্য সকলে শপত লৈ জাতীয়তাবাদী ক্ষেত্ৰত কোনো কাৰণতে অসমীয়া জাতি, মাটি, ভেঁটি ধ্বংস কৰিবলৈ বিচৰা সকলক ক্ষমা কৰা নহ'ব বুলি হুংকাৰ দিয়ে ৷ বিজেপি চৰকাৰে বলবৎ কৰা 'কা' (নাগৰিকত্ব সংশোধনী আইন) কোনো কাৰণতে মানি লোৱা নহ’ব বুলিও আছু কৰ্মী সকলে হুংকাৰ দিয়ে ৷ আছুৰ লগতে শ্বহীদৰ পৰিয়ালেও কোনো কাৰণতে জাতিধ্বংসী আইন মানি নোলোৱাৰ হুংকাৰ প্ৰদান কৰে ৷
লগতে পঢ়ক: খুমটাইত চুকাফাৰ ৩৫ ফুট উচ্চতাৰ প্ৰতিমূৰ্তি উন্মোচন
