মৰাণ, 21 ফেব্ৰুৱাৰীঃ মৰাণৰ সমীপৱৰ্তী মৰাণ ৰাজহ চক্ৰৰ অন্তৰ্গত 3 নং চৰাইহাবিত ভয়াৱহ ৰূপ গৰা-খহনীয়াৰ ৷ বুঢ়ীদিহিঙৰ গৰা-খহনীয়াই কালৰূপ ধাৰণ কৰিছে 3 নং চৰাইহাবীত ৷দীৰ্ঘদিনৰ পৰাই হৈ থকা খহনীয়াত অঞ্চলটোৰ বহু লোকৰ মাটি-ভেঁটি জাহ যোৱাৰ পাচতো কোনো কাণষাৰ নাই চৰকাৰ অথবা জনপ্ৰতিনিধিৰ ৷ ডিব্ৰুগড় জিলাৰ মৰাণ ৰাজহ চক্ৰৰ অন্তৰ্গত এই গাঁৱখনত বিগত প্ৰায় এটা দশক ধৰি এনেদৰে কালৰূপ ধাৰণ কৰি আহিছে বুঢ়ীদিহিঙৰ গৰা-খহনীয়াই ৷ ইতিমধ্যে ভয়াৱহ খহনীয়াত বহু লোকে বাৰম্বাৰ ঘৰৰ ভেটি সলাবলৈ বাধ্য হৈছে ৷ গাঁৱখনত থকা একমাত্ৰ বিদ্যালয়খনো স্থানান্তৰ কৰিবলগীয়া হৈছে ।
খহনীয়াত জাহ গৈছে বিস্তৰ কৃষিভূমিৰ লগতে বহু মূল্যবান গছ-গছনি,গাঁৱৰ আলিবাট,বিদ্যুতৰ খুঁটা পৰ্যন্ত ৷ কিন্তু জনসাধাৰণৰ এনে দুৰৱস্থাৰ পিচতো খবৰ ল’বলৈ আহৰি নাই স্থানীয় জনপ্ৰতিনিধিৰ ৷ খহনীয়া ৰোধৰো কোনো ব্যৱস্থা গ্ৰহণ কৰা নাই সংশ্লিষ্ট বিভাগে ৷ ফলত মাটি-ভেটি হেৰুৱাৰ গভীৰ সংকটত পৰিছে গাঁৱবাসী ।
