মৰাণ, 29 জুন: চাবুৱাৰ বিন্ধাকটা পঞ্চায়তৰ অন্তৰ্গত নেপালী গেৰেকী অঞ্চলত ডিব্ৰু নৈৰ গৰাখহনীয়া অব্যাহত আছে (Dibru River erosion at Chabua ) ৷ চপৰা চপৰে খহিছে নৈৰ গৰা । ডিব্ৰু নৈৰ গৰাখহনীয়াই উটুৱাই নিয়ে 14 টাতকৈ অধিক পৰিয়ালৰ আপোন ঘৰখন ৷ ফলত কান্দোনত ভাগি পৰিছে নৈপৰীয়া ৰাইজ ৷
ইফালে, নেপালী গেৰেকী অঞ্চললৈ যাতায়তৰ বাবে এতিয়া জলপথেই মূলপথ হৈ পৰিছে ৷ কিয়নো যি স্থল পথ আছিল, সেই পথটো বন্যাৰ্তৰ শিবিৰৰ কাষতে হোৱাৰ বাবে সুৰক্ষাজনিত কাৰণত সন্ধিয়া হোৱাৰ লগে লগেই বন্ধ কৰি দিয়াত অঞ্চলটোৰ ৰাইজ যথেষ্ট অসুবিধাৰ সন্মুখীন হ'বলগীয়া হৈছে ৷ বুধবাৰে খহনীয়াগ্ৰস্ত অঞ্চলটো পৰিদৰ্শন কৰি চাবুৱা সমষ্টিৰ বিধায়ক পোনাকণ বৰুৱাই (Ponakan Baruah at Chabua) ২৩৭ টা পৰিয়ালক ব্যক্তিগতভাৱে খাদ্য সামগ্ৰী বিতৰণ কৰে ৷
বিধায়ক গৰাকীয়ে ৰাইজৰ লগত মত বিনিময় কৰি ৰাইজৰ অভাৱ অভিযোগসমূহ জানিবলৈ চেষ্টা কৰাৰ লগতে খহনীয়া প্ৰতিৰোধ কৰিবলৈ অসম চৰকাৰে ১৩০ কোটি টকাৰে বৃহৎ আঁচনি হাতত লোৱাৰ কথা অৱগত কৰে বিধায়কগৰাকীয়ে ৷ লগতে বিধায়ক পোনাকণ বৰুৱাই জলসম্পদ বিভাগৰ অভিযন্তাক লগত লৈ সমগ্ৰ অঞ্চলটো পৰিদৰ্শন কৰি গৰাখহনীয়া প্ৰতিৰোধৰ বাবে ব্যৱস্থা গ্ৰহণ কৰিবলৈ নিৰ্দেশনা প্ৰদান দিয়ে ৷
লগতে পঢ়ক: কামাখ্যা মন্দিৰত মহাৰাষ্ট্ৰৰ বিসম্বাদী বিধায়কৰ পূজা অৰ্চনা
