যোৰহাট : আশা-প্ৰত্যাশাৰ অন্তত এটা বছৰক বিদায় দি নতুন এটা বর্ষক আদৰিবলৈ সাজু হৈছে সকলো । বহুতে বহুত পালে, কোনোৱে সৰ্বস্ৰ হেৰুৱালে । তাৰ মাজতে নতুনক আদৰিবলৈ সাজু হৈছে সকলো, কাৰণ এয়া প্ৰকৃতি । লগতে ২০২৪ ত হৈ যোৱা সকলো পাহৰি নতুন বৰ্ষটোত বহু আশা-প্ৰত্যাশা বুকুত বান্ধি আগুৱাই যোৱাৰ পণ বান্ধিছে সকলোৱে । তাৰ মাজতে ২০২৪ বৰ্ষটোত সাংস্কৃতিক ৰাজধানীখ্যাত যোৰহাটে কি কি পালে তাৰেই আভাস দিবলৈ চেষ্টা কৰা হৈছে ।
সাহিত্যত যোৰহাট:
২০২৪ বৰ্ষটো যোৰহাটৰ বাবে এটি উল্লেখনীয় বছৰ হিচাপে পৰিগণিত হৈছে । ২০২৪ বৰ্ষটোত যোৰহাট জিলাই সুদীৰ্ঘ ৩৭ বছৰৰ পাছত অসম সাহিত্য সভাৰ সভাপতি আৰু প্ৰধান সম্পাদক পালে । ড৹ বসন্ত কুমাৰ গোস্বামী সাহিত্য সভাৰ সভাপতি আৰু দেৱজিৎ বৰা প্ৰধান সম্পাদক হিচাপে নিৰ্বাচিত হ’ল । দুয়োগৰাকীয়েই যোৰহাটৰ ৷
ৰাজনীতিৰ পৰা ক্ৰীড়ালৈকে:
২০২৪ বৰ্ষটোত লোকসভাত বিৰোধী দলৰ এজন উপ-দলপতি পালে যোৰহাট জিলাই । কংগ্ৰেছ দলৰ তথা যোৰহাট লোকসভাৰ সাংসদ গৌৰৱ গগৈয়ে লোকসভাৰ বিৰোধী উপ-দলপতি হিচাপে নিযুক্ত হ’ল ।
অসম লোকসেৱা আয়োগৰ ফলাফলতো যোৰহাটৰ বহু কেইজনে উত্তীৰ্ণ হৈ যোৰহাট জিলালৈ সন্মান বুটলি আনিবলৈ সক্ষম হ’ল ।
লগতে পঢ়ক : আন্তঃৰাজ্যিক সীমা বিবাদ: আশা-প্ৰত্যাশাৰ মাজত ঘটনাবহুল এটা বছৰ লগতে পঢ়ক : অসমীয়া ছবি: মুঠিৰ পৰা বালি সৰকা দি সৰি গ'ল বছৰটো, দি গ'ল সুখৰ অনুভৱ |
২০২৪ বৰ্ষত যোৰহাট জিলাই আন্তঃৰাষ্ট্ৰীয় মানৰ এখন ষ্টেডিয়াম লাভ কৰিবলৈ সক্ষম হ’ল, যোৰহাট কাছাৰী মৈদাম আৰু যোৰহাট ষ্টেডিয়াম দুয়োখন লগ লগাই নিৰ্মাণ হ’ব লগা এই ষ্টেডিয়ামৰ কাম বৰ্তমান চলি আছে ।
ভোগদৈক পুনৰুদ্ধাৰৰ পৰা উৰণসেতুলৈকে:
যোৰহাটৰ আয়ুসৰেখা স্বৰূপ তথা মানুহে মৃত্যুৰ মুখলৈ ঠেলি দিয়া ভোগদৈ নদীক পৰিষ্কাৰ কৰি মৃত্যুমুখৰ পৰা উদ্ধাৰৰ চেষ্টা চলোৱা হৈছে ২০২৪ বর্ষতেই ।
২০২৪ বর্ষতেই যোৰহাটৰ উন্নয়নমূলক কাম-কাজসমূহ চলি থকাৰ সমান্তৰালকৈ যোৰহাটৰ মাজেৰে বৰুৱা চাৰিআলিৰ পৰা ভোগদৈ দলংলৈকে উৰণসেতুৰ কাম পূৰ্ণগতিত চলি আছে । মুঠৰ ওপৰত ২০২৪ বৰ্ষটোত যোৰহাট জিলা বহু আগুৱাই গ’ল বুলি অনুভৱ কৰে যোৰহটীয়া ৰাইজে ৷
জিলাবাসীয়ে সাহিত্য, সংস্কৃতি, ৰাজনীতিৰ লগতে অন্যান্য ক্ষেত্ৰতো বহু আশা কৰিছে । এতিয়া ২০২৪ ক বিদায় দি এটা নতুন বৰ্ষ ২০২৫ ক আদৰিবলৈ সাজু সকলো । সকলোৱে আশা কৰিছে ২০২৫ বৰ্ষটোত সকলোৰে দিনবোৰ ভালে যাওক । হত্যা-হিংসা অবিহনে সকলোৱে মিলাপ্ৰীতিৰে সমন্বয়ৰ বাৰ্তা কঢ়িয়াই অসমখনক যাতে আগুৱাই নিব পাৰে ।
