মৰাণ, 30 মে': ডিব্ৰুগড় জিলাৰ মৰাণ ৰাজহ চক্ৰৰঅন্তৰ্গত খোৱাঙৰ বৰবিল খলিহামাৰীত বুঢ়ীদিহিং নদীৰ গৰাখহনীয়াই ভাবুকি কঢ়িয়াইছে দাতিকাষৰীয়া ৭ খন গাঁৱৰ ৰাইজলৈ । পৰিস্থিতি ইমানেই বিপদসংকুল হৈ পৰিছে যে উপায়হীন স্থানীয় ৰাইজে জলদেৱতাক পূজা কৰিবলৈ আৰম্ভ কৰিছে । খহনীয়াৰ প্ৰকোপ ইমানেই বাঢ়িছে যে আৰু প্ৰায় ৬০ মিটাৰ খহিলেই স্পৰ্শ কৰিব মথাউৰি ।
যাৰ ফলত শংকিত হৈ পৰিছে অঞ্চলবাসী । বৃহত্তৰ অঞ্চলটোৰ বৰবিল, গৰৈমাৰী, খলিহামাৰি, গেৰগেৰি, দলনিকোৰ, বৰবিল ব্লক, মইনা গাঁও আদি গাঁৱৰ সহস্ৰাধিক ৰাইজৰ নিদ্ৰা কাঢ়িছে এতিয়া গৰাখহনীয়াই ।
স্থানীয় ৰাইজে জানিবলৈ দিয়া অনুসৰি খহনীয়া ৰোধৰ বাবে সংশ্লিষ্ট বিভাগৰ লগতে মৰাণ সমষ্টিৰ বিধায়ক গৰাকীক বহু আবেদন নিবেদন কৰা হৈছে যদিও কাৰ্যতঃ কোনো ব্যৱস্থা গ্ৰহণ কৰা নাই ।
উল্লেখযোগ্য যে বৃহৎ অঞ্চলটোৰ ৰাইজে কৃষি কৰ্ম কৰিয়েই জীৱন নিৰ্বাহ কৰি আছে । তেনেস্থলত বুঢ়ীদিহিং নদীৰ এই গৰাখহনীয়াই তেওঁলোকৰ জীৱন জীৱিকাৰ প্ৰতিও ভাবুকি কঢ়িয়াইছে । উপায়হীন ৰাইজে সেয়ে বিভাগীয় মন্ত্ৰীগৰাকীৰ প্ৰত্যক্ষ সহযোগিতা কামনা কৰিছে ।
উল্লেখ্য যে বৰবিল খলিহামাৰী অঞ্চলত প্ৰায় তিনি সহস্ৰাধিক লোক বসবাস কৰে আৰু এই গাওঁবাসীয়ে উৎপাদন কৰি অহা কৃষি সামগ্ৰীয়ে সমগ্ৰ মৰাণ অঞ্চলৰ বজাৰ দখল কৰি আহিছে ৷ তেনেক্ষেত্ৰত এতিয়া এই অঞ্চলটো খহনীয়াৰ কৱলত পৰাৰ গাওঁবাসীৰ জীৱিকাৰ প্ৰতিও ভাবুকি আহি পৰিছে ৷
লগতে পঢ়ক: ৰাষ্ট্ৰীয় পাঞ্জা প্ৰতিযোগিতাত দুটাকৈ পদক অৰ্জন টিংখাঙৰ পুষ্পা গগৈৰ
