পূৱ বিলাসীপাৰা, ৬ ফেব্ৰুৱাৰী: ধুবুৰী জিলাৰ পূৱ বিলাসীপাৰাৰ চাপৰৰ ধীৰঘাটত শনিবাৰে শতাধিক শ্ৰমিক আৰু উপ-ঠিকাদাৰৰ প্ৰতিবাদ সাব্যস্ত কৰে । ময়নাগুৰিৰ পৰা যোগীঘোপা সংযোগী ৰে’লপথ নিৰ্মাণত এইসকল শ্ৰমিক আৰু উপ-ঠিকাদাৰে কাম কৰিছিল । কিন্তু তেওঁলোকে প্ৰাপ্যৰ পৰা বঞ্চিত হোৱাত শনিবাৰে তীব্ৰ প্ৰতিবাদ সাব্যস্ত কৰে । প্ৰতিবাদকাৰীসকলৰ অভিযোগ অনুসৰি, ৰে’লপথ নিৰ্মাণ কাৰ্যত চাপৰ অঞ্চলৰ ছয়খনকৈ দলঙৰ উইং দেৱালৰ নিৰ্মাণৰ কামৰ উপ-ঠিকা লাভ কৰিছিল চাপৰৰ ধীৰঘাট অঞ্চলৰ একাংশ যুৱকে । নিজৰ ধন ব্যয় কৰি সম্পূৰ্ণ কৰিছিল এই নিৰ্মাণকাৰ্যৰ কাম ।
এই নিৰ্মাণকাৰ্যৰ ৮০ শতাংশ কাম সম্পূৰ্ণ হ'লে তেওঁলোকে প্ৰাপ্য ধন পাব বুলি আশ্বাস প্ৰদান কৰিছিল ঠিকাদাৰ তথা চাপৰৰ ধীৰঘাট অঞ্চলৰ দায়িত্ব থকা ৰে’ল বিভাগৰ অভিযন্তাই । সেইমৰ্মে ঠিকাদাৰ চন্দন ডেকা আৰু ৰহিজউদ্দিন আহমেদৰ সৈতে যুৱককেইজনৰ লগত চুক্তি হৈছিল । চুক্তি অনুসৰি, প্ৰায় ১ কোটি ৪৯ লাখ টকাৰ কাম ইতিমধ্যে সম্পূৰ্ণ হৈ গৈছে । কিন্তু কাম সম্পূৰ্ণ হৈ যোৱাৰ পাচতো তেওঁলোকে প্ৰাপ্য ধনৰ পৰা বঞ্চিত হ'বলগীয়া হয় । অৱশেষত ঠিকাদাৰ চন্দন ডেকাই যুৱককেইজনৰ হাতত লক্ষাধিক টকাৰ আঠখনকৈ চেক শ্ৰমিকসকলক দিছিল যদিও সেইকেইখন বাউঞ্চ চেক বুলি জানিব পৰা গৈছে । পৰৱৰ্তী সময়ত উপায়বিহীন হৈ শনিবাৰে ধীৰঘাটস্থিত ৰে’লপথৰ কাষত প্ৰতিবাদমুখৰ হৈ পৰে এইসকল লোক । প্ৰাপ্য ধনৰ পৰা বঞ্চিত এইসকল প্ৰতিবাদকাৰীয়ে তেওঁলোকৰ প্ৰাপ্য ধনৰ দাবী জনায় । তেওঁলোকৰ দাবী গ্ৰহন নকৰিলে আত্মজাহৰো হুংকাৰ প্ৰদান কৰে উপ ঠিকাদাৰ আৰু শ্ৰমিকসকলে ।
