পূৱ বিলাসীপাৰা,১৪ নৱেম্বৰ: হাতত গোলাপ ফুলৰ পুলি লৈ বিদ্যালয়ে বিদ্যালয়ে যাত্ৰা গংগাধৰ ৰায়ৰ। কোন এই গংগাধৰ ৰায় ! কিহৰ বাবে এই যাত্ৰা গংগাধৰ ৰায়ৰ ! ধুবুৰী জিলাৰ বহলপুৰত বৃহস্পতিবাৰে দেখা গ’ল এই ব্যতিক্ৰমী দৃশ্য ৷
আজি ভাৰতৰ ভূতপূৰ্ব প্ৰধানমন্ত্ৰী পণ্ডিত জৱাহৰলাল নেহৰুৰ জন্মদিন ৷ অৰ্থাৎ আজি শিশু দিৱস ৷ এই শিশু দিৱস সমগ্ৰ দেশৰ লগতে অসমতো আনুষ্ঠানিকভাৱে পালন কৰা হয় ৷ ৰাজ্যখনৰ ধুবুৰী জিলাৰ চাপৰৰ বহলপুৰৰ বিদ্যালয়সমূহত শিশু দিৱস উদযাপন কৰা হয়। কিন্তু বহলপুৰত অইনবাৰৰ তুলনাত এইবাৰ কিছু ব্যতিক্ৰমভাৱে শিশু দিৱস উদযাপন কৰা হয় ৷ বিশেষকৈ এগৰাকী সমাজকৰ্মীৰ তৎপৰতাত ব্যতিক্ৰমীভাৱে পালন কৰা হয় এই দিৱস ৷ নেহৰুৰ প্ৰিয় ৰঙা গোলাপৰ পুলি লৈ বিদ্যালয়ে বিদ্যালয়ে উপস্থিত হয় বহলপুৰৰ বিশিষ্ট সমাজকৰ্মী গংগাধৰ ৰায় । গোলাপ ফুলৰ জৰিয়তে কণ কণ শিশুসকলৰ মাজত পণ্ডিত জৱাহৰলাল নেহৰুৰ বিষয়ে সম্যক জ্ঞান দিয়াৰ প্ৰয়াস কৰে ব্যক্তিগৰাকীয়ে। গোলাপ ফুলৰ জৰিয়তে যাতে শিশুসকলে নেহৰুৰ আদৰ্শ গ্ৰহণ কৰিব পাৰে তাৰ বাবে এই পদক্ষেপ গ্ৰহণ কৰা বুলি ৰয়ে উল্লেখ কৰে ৷ গংগাধৰ ৰায়ৰ এনে ব্যতিক্ৰমী প্ৰচেষ্টাক শলাগ লৈছে বহলপুৰৰ বিভিন্ন সচেতন মহলে ।
