জোনাই, 20 জুনঃ ভৌগলিক মানচিত্ৰৰ পৰা বিলিন হৈ যোৱাৰ পথত জোনাই সীমান্তৰ ঐতিহ্যমণ্ডিত ঐৰামঘাট ৷ চিয়াং নদীৰ ব্যাপক খহনীয়াত দিনকদিনে সংকুচিত হৈ আহিছে ঐৰামঘাটৰ ভৌগোলিক সীমা ৷ ধেমাজি জিলাৰ অসম অৰুণাচল সীমান্ত জোনাইত চিয়াং নদীৰ ভয়ংকৰ খহনীয়াৰ কবলত পৰিছে ঐৰামঘাট অঞ্চল ৷ নৈৰ জলপৃষ্ঠ ক্ৰমান্নয়ে বৃদ্ধি পোৱাৰ ফলত ঐৰামঘাটত ব্যাপকভাৱে খহনীয়া অব্যাহত ৰাখিছে চিয়াং নদীয়ে ৷
চকুৰ সন্মুখতে প্ৰতিদিনে শ শ বিঘা মাটি নৈত জাহ যোৱাৰ ফলত আতংকিত হৈ পৰিছে অঞ্চলটোৰ নৈপৰীয়া ৰাইজ । প্ৰতি বছৰে ব্যাপক গৰাখহনীয়াৰ কবলত পৰে ঐৰামঘাটবাসী ৷ ইতিমধ্যে অঞ্চলটোৰ শ শ বিঘা কৃষিভূমিৰ বিলীন হৈছে চিয়াঙৰ বুকুত। নৈত জাহ গৈছে কুৰিটাৰো অধিক পৰিয়ালৰ ঘৰ-দুৱাৰ, অনুষ্ঠান-প্ৰতিষ্ঠান। কিন্তু চৰকাৰ কিম্বা জলসম্পদ বিভাগ তথা জনপ্ৰতিনিধিয়ে এই পৰ্যন্ত কোনো প্ৰতিৰোধ ব্যৱস্থা গ্ৰহণ কৰা নাই ৷
জানিব পৰা মতে,গৰাখহনীয়াই কালৰূপ ধাৰণ কৰি অহাৰ ফলত ভাবুকি আহি পৰিছে ঐৰামঘাট অঞ্চললৈ। নিৰ্বাচনৰ সময়ত ভোট বিচাৰি অহা জনপ্ৰতিনিধিসকলে ভোটৰ আশাত ৰাইজক চিয়াং নদীৰ খহনীয়া প্ৰতিৰোধৰ স্থায়ী সমাধানৰ প্ৰতিশ্ৰুতি দিয়ে ৷ কিন্তু জয়ী হোৱাৰ পিছত বানত ককবকাই থকা ঐৰামঘাটবাসীলৈ এপলক চোৱাৰ আহৰি নাই জনপ্ৰতিনিধিৰ ৷
লগতে পঢ়কঃ অসমৰ COVID-19 ৰোগীৰ সেৱাৰ্থে ব্যৱহৃত হ'ব ৰবট
2019 চনত ৰাজ্য চৰকাৰৰ কেইবাজন মন্ত্ৰী-বিধায়কে খহনীয়া অঞ্চলসমূহ পৰিভ্ৰমণ কৰি নৈপৰীয়া ৰাইজক বিভিন্ন আশ্বাস দিছিল যদিও আশ্বাসসমূহ ফুটুকাৰ ফেনত পৰিণত হৈছে । খহনীয়াৰ ভয়ংকৰ ৰূপ প্ৰত্যক্ষ কৰি অন্য ঠাইলৈ ঢাপলি মেলিছে অঞ্চলটোৰ ৰাইজে ৷ উল্লেখ্য যে, এখনৰ পাছত আন এখনকৈ ঘৰ লগতে কৃষিভূমি চিয়াংৰ বুকুত নিশ্চিহ্ন হৈ গ'লে মানচিত্ৰৰ পৰা নাইকিয়া হ’ব ৰম্যভূমি ঐৰামঘাট ।
আনহাতে চিয়াং নদীৰ খহনীয়াই ভাবুকি কঢ়িয়াই আনিছে ধেমাজি জিলাৰ একমাত্ৰ পবা সংৰক্ষিত বনাঞ্চলখনলৈও ৷ উল্লেখ্য যে পবা বনাঞ্চলে জোনাই মহকুমাক ভৌগোলিকভাৱে বছৰ বছৰ ধৰি সুৰক্ষা দি আহিছে ৷
