চিৰাং, 17 আগষ্ট : চিৰাঙত পুনৰ পোহৰলৈ আহিছে নাবালিকা ধৰ্ষণৰ জঘন্য কাণ্ড । জিলাখনৰ সদৰ কাজলগাঁৱত এগৰাকী ষষ্ঠ শ্ৰেণীৰ ছাত্ৰীক বলপূৰ্বকভাৱে দুই যুৱকে ঘৰৰ সন্মুখৰ পৰা মুখত সোপা দি বলেৰো গাড়ীত উঠাই নিয়ে ৷ স্বাধীনতা দিৱসৰ নিশা 31 নং ৰাষ্ট্ৰীয় ঘাইপথৰ বৰতালোৱাৰ উৰনীয়া সেঁতুৰ ওপৰত এই জঘন্য কাণ্ড সংঘটিত কৰে দুই অভিযুক্তই । কোনোমতে নিজৰ প্ৰাণ ৰক্ষা কৰি কিশোৰীগৰাকীয়ে যুৱকৰ ওচৰৰ পৰা পলাই হাৰিবলৈ সক্ষম হয় ৷ ৰাষ্ট্ৰীয় ঘাইপথেৰে পলায়ন কৰাৰ সময়তে কিশোৰী গৰাকীক বৈখুনগাঁওৰ এজন বয়োজ্যেষ্ঠ লোকে উদ্ধাৰ কৰি ঢালিগাঁও আৰক্ষী থানাত গতাই দিয়ে । পিতৃৰ এজাহাৰৰ ভিত্তিত ইতিমধ্যে কিশোৰী গৰাকীৰ স্বাস্থ্য পৰীক্ষা সম্পন্ন কৰা হৈছে ৷
ভাৰতীয় দণ্ডবিধিৰ ধাৰা 176 (বি) আৰু নাবালিকা ধৰ্ষণ প্ৰতিৰোধী আইন (POCSO) অনুসৰি ঢালিগাঁও আৰক্ষী থানাত এক গোচৰ পঞ্জীয়ন কৰা হৈছে । ধৰ্ষণকাৰী যুৱক দুজনক তেওঁ চিনি পাই যদিও তেওঁলোকৰ নাম নাজানে বুলি স্বীকাৰোক্তিত প্ৰকাশ কৰে কিশোৰী গৰাকীয়ে । আনহাতে, সমগ্ৰ ঘটনাৰ পাছতে তদন্ত অব্যাহত ৰাখিছে বুলি জানিবলৈ দিয়ে চিৰাং জিলাৰ আৰক্ষী অধীক্ষক সুধাকৰ সিঙে ।
এই জঘন্য কাণ্ডৰ পাছতে চিৰাঙৰ বিভিন্ন দল - সংগঠনে প্ৰতিবাদ সাব্যস্ত কৰিছে ৷ চিৰাং জিলা সমিতি নিখিল বড়ো ছাত্ৰ সন্থাৰ (এবছু) সভাপতি খনিন্দ্ৰ বড়োয়ে মন্তব্য কৰে যে, যোৱা মাৰ্চ মাহৰ পৰা বৰ্তমানলৈকে চিৰাঙত কেইবাটাও নাবালিকা ধৰ্ষণৰ ঘটনা সংঘটিত হৈছে । এই ক্ষেত্ৰত আৰক্ষীয়ে নিৰ্লিপ্ত ভূমিকা গ্ৰহণ কৰি আহিছে বুলি প্ৰকাশ কৰে বড়োয়ে । অতিশীঘ্ৰেই ধৰ্ষণকাৰীক গ্ৰেপ্তাৰ কৰি দৃষ্টান্তমূলক শাস্তি প্ৰদানৰ দাবী জনাই এবছুৰ নেতাজনে । একেদৰে ধৰ্ষিতা গৰাকীৰ স্বাস্থ্যৰ বুজ লৈ বিটিচিৰ কাজলগাঁও পৰিষদীয় সমষ্টিৰ এম চি এল এ ৰণগৌৰা নাৰ্জাৰীয়ে কয় যে, আৰক্ষী তথা জিলা প্ৰশাসনে এনে ঘটনাৰ তদন্ত কৰি দৃষ্টান্তমূলক শাস্তি প্ৰদান কৰিব লাগে ।
