চিৰাং, 8 আগষ্ট : অসম চৰকাৰৰ এক উল্লেখযোগ্য পদক্ষেপ ৷ অসম চৰকাৰৰ তৰফৰ পৰা শুকুৰবাৰে চিৰাং জিলাৰ ভাৰত-ভূটান সীমান্তৰ দেউশ্ৰীত দৰিদ্ৰ পৰিয়ালৰ মাজত চেক বিতৰণ কৰা হয় ৷ প্ৰায় 30 টা পৰিয়ালৰ মাজত 20 হাজাৰ টকাৰ চেক বিতৰণ কৰা হয় ৷
উল্লেখ্য যে, ড্ৰাগছ তথা অন্যান্য অবৈধ ব্যৱসায়ৰ সমান্তৰালকৈ মানৱ সৰবৰাহকাৰীৰ বিৰুদ্ধে অভিযান তীব্ৰতৰ কৰিছে অসম আৰক্ষীয়ে ৷ আৰক্ষীৰ অভিযানত শেহতীয়াকৈ ছিকিমৰ পৰা উদ্ধাৰ কৰা হৈছিল মানৱ সৰবৰাহকাৰীৰ কবলত পৰা চিৰাঙৰ 42 টাকৈ শিশু ৷ ৩০ জুলাইত চিৰাঙৰ বেংতল কলেজত উপস্থিত হৈ উক্ত 42 টা শিশুৰ অভিভাৱকৰে আলোচনাত মিলিত হয় মুখ্যমন্ত্ৰী ড৹ হিমন্ত বিশ্ব শৰ্মা ৷
উক্ত আলোচনাত উপস্থিত থাকি মানৱ সৰবৰাহকাৰী চক্ৰৰ বলি হোৱা প্ৰতিটো পৰিয়াললৈ 20 হাজাৰ টকাৰ চেক প্ৰদানৰ লগতে অৰুণোদয় আঁচনিত সহায়ৰ প্ৰতিশ্ৰুতি দিয়ে বিটিআৰৰ মুখ্য প্ৰমোদ বড়োৱে ৷ সেই প্ৰতিশ্ৰুতি মৰ্মে শুকুৰবাৰে চিৰাং জিলাৰ ভাৰত-ভূটান সীমান্তৰ দেউশ্ৰীত মানৱ সৰবৰাহকাৰীৰ কবলৰ পৰা উদ্ধাৰ কৰা শিশুৰ পৰিয়ালক ২০ হেজাৰ টকাৰ চেক বিতৰণ কৰা হয় ৷
এই অনুষ্ঠানত উপস্থিত থাকে বিটিআৰৰ বন বিভাগৰ কাৰ্যবাহী সদস্য ৰঞ্জিত বসুমতাৰী(বি আৰ ফেৰেংগা) আৰু সমাজ কল্যাণ বিভাগৰ কাৰ্যবাহী সদস্য গৌতম দাস ৷ বিটিআৰৰ ভিতৰত অতিকৈ পিছপৰা চিৰাং জিলাৰ ভাৰত-ভূটান সীমান্তৰ এইসমূহ অঞ্চলত থলুৱাভাৱে কৰ্ম সংস্থাপন গঢ়ি তুলিবলৈ এইক্ষেত্ৰত ব্যৱস্থা গ্ৰহণ কৰিব বুলিও মত প্ৰকাশ কৰে কাৰ্যবাহী সদস্যদ্বয়ে । উল্লেখ্য যে, চিৰাং জিলাৰ দাদগিৰি আৰু ৰুণীখাটাৰ বিস্তৃৰ্ণ অঞ্চলৰ পৰা মানৱ সৰবৰাহকাৰীয়ে 80 গৰাকী নাবালিকা কিশোৰ-কিশোৰীক ছিকিমলৈ চালান দিছিল ৷
ইয়াৰে ভিতৰত 42 গৰাকী কিশোৰ-কিশোৰীক কিছুদিন পূৰ্বে অসম আৰক্ষীয়ে উত্তৰ ছিকিমৰ পৰা উদ্ধাৰ কৰিছিল ৷ মানৱ সৰবৰাহকাৰী চক্ৰৰ পৰা উদ্ধাৰ কৰাৰ পিছত তেওঁলোকক আৰক্ষীৰ কঠোৰ নিৰাপত্তাৰ বেষ্টনীত কোকৰাঝাৰ সদৰ চহৰৰ প্ৰশান্তি লজত ৰখা হৈছিল ৷ তাৰ পাচত ৩০ জুলাইত মুখ্যমন্ত্ৰীয়ে চিআইটিৰ প্ৰেক্ষাগৃহত শিশুসকলৰ সতে মত বিনিময় কৰিছিল ৷
লগতে পঢ়ক: মানৱ সৰবৰাহকাৰীৰ কৱলত পৰা শিশুৰ পৰিয়ালৰে মুখ্যমন্ত্ৰীৰ মত-বিনিময়
