শিৱসাগৰ,5 মে': চৰাইদেউৰ নামতোলাত আৰক্ষীৰ অভিযানত গ্ৰেপ্তাৰ দুই ড্ৰাগছ মাফিয়া ৷ জব্দ হয় বুজন পৰিমাণৰ নিষিদ্ধ ড্ৰাগছ ৷ অবৈধ বেহা-বেপাৰৰ ৰমৰমীয়া ঘাটিলৈ ইতিমধ্যে পৰ্যবসিত হোৱা অসম-নাগালেণ্ড আন্তঃৰাজ্যিক সীমান্তৱৰ্তী নামতোলা অঞ্চলত চলি থকা নিষিদ্ধ ড্ৰাগছৰ ব্যৱসায় আৰু প্ৰচলন ৰোধ কৰিবলৈ চৰাইদেউ জিলা আৰক্ষীয়ে যোৱা কিছুদিন ধৰি গ্ৰহণ কৰিছে বিশেষ অভিযান । অঞ্চলটোত একাংশ ব্যৱসায়ীয়ে বিভিন্ন পক্ষক মেনেজ কৰি নিষিদ্ধ ড্ৰাগছৰ সমান্তৰালভাৱে অবৈধ সুৰা, ভাং, কানি, নিচাযুক্ত টেবলেট আদিৰ ব্যৱসায় ৰমৰমীয়াভাৱে অব্যাহত ৰখাৰ গুৰুতৰ অভিযোগ উত্থাপিত হৈ আহিছিল বিগত সময়চোৱাত ।
সীমান্তৱৰ্তী অঞ্চলটোত এইদৰে অবৈধ ড্ৰাগছৰ লগতে নিষিদ্ধ নিচাজাতীয় দ্ৰব্যৰ বেহা অব্যাহত থকাৰ সময়তে গোপন সূত্ৰৰ পম খেদি বুধবাৰে পুৱা চৰাইদেউ জিলাৰ উপ-আৰক্ষী অধীক্ষক অনিতা কোঁৱৰৰ নেতৃত্বত আৰু নামতোলা আৰক্ষীৰ সহযোগত অভিযান চলাই বুজন পৰিমাণৰ নিষিদ্ধ ড্ৰাগছ জব্দ কৰিবলৈ সক্ষম হয় ।
জানিব পৰা মতে, নামতোলাৰ নাগালেণ্ড সীমান্তত থকা গাহৰিকটা লাইনৰ মদন থাপাৰ পুত্ৰ মইনা থাপা আৰু হাতীকেম্প অঞ্চলৰ আফচৰ আলীৰ পুত্ৰ ৰোনাল আলীৰ ঘৰত আৰক্ষীয়ে গোপন সূত্ৰে বিশেষ অভিযান চলায় ৷ অভিযানকাৰী আৰক্ষীৰ দলটোৱে দুই ড্ৰাগছ মাফিয়াৰ জিম্মাৰ পৰা তিনি গ্ৰাম ড্ৰাগছসহ এই ব্যৱসায়ত ব্যৱহৃত বহু সংখ্যক পাত্ৰ, চিৰিঞ্জ আৰু ড্ৰাগছ সেৱনত ব্যৱহাৰ কৰা কাগজ উদ্ধাৰ কৰিবলৈ সক্ষম হয় ৷ আটকাধীন দুয়োগৰাকী ড্ৰাগছ ব্যৱসায়ীৰ বিৰুদ্ধে নামতোলা আৰক্ষী থানাত আৰক্ষীয়ে নিজাববীয়াকৈ এক গোচৰ ৰুজু কৰি জেৰা অব্যাহত ৰাখিছে ৷
লগতে পঢ়ক : মমতা বেনাৰ্জীক অভিনন্দন জনালে প্ৰধানমন্ত্ৰী নৰেন্দ্ৰ মোডীয়ে
