শিলচৰ, 11 ছেপ্টেম্বৰ : কাছাৰৰ উদাৰবন্দৰ গোসাইপুৰ মধুৰা নদীত অবাধে চলিছে বালি খনন । দৈনিক শ শ ট্ৰাকেৰে অবৈধভাৱে বালি সৰবৰাহ হৈ আছে সেই স্থানৰ পৰা ৷ অঞ্চলটোৰ স্থানীয় ৰাইজে কৰিছে এই অভিযোগ ।
অভিযোগ অনুসৰি, মধুৰা নদীৰ গোসাইপুৰ প্রথম খণ্ডৰ হজপুৰৰ ফেৰিঘাটৰ এলেকাৰ পৰা প্ৰতিদিনই পাৰ হৈছে অবৈধভাবে বালি কঢ়িওৱা ট্ৰাক । উদাৰবন্দৰ বন বিভাগক অন্ধকাৰত ৰাখি নিশা হ’লেই এইদৰে বালি সৰবৰাহ কৰে এটা চক্ৰই । অবৈধ বালি সৰবৰাহকাৰীৰ বাবেই নদীৰ বুকুত জাহ গৈছে বহু কৃষি ভূমি । ইফালে ইষ্টামপুৰ - মধুৰাপুল পথেৰে বালি ভর্তি গাড়ী চলাচল কৰাত অতিষ্ঠ হৈ পৰিছে স্থানীয় ৰাইজ । সেয়েহে অবৈধ বালি সৰবৰাহ বন্ধ কৰিবলৈ বন বিভাগক আবেদন জনাইছে তেওঁলোকে ।
উল্লেখ্য যে, খোদ বনমন্ত্ৰী পৰিমল শুক্লবৈদ্যৰ গৃহ জিলাতে সংঘটিত হৈ আহিছে এই বলি সৰবৰাহৰ ঘটনা ৷ বনমন্ত্ৰীগৰাকীয়ে এই খনন আৰু সৰবৰাহ ৰোধৰ ক্ষেত্ৰত কি ব্যবস্থা গ্ৰহণ কৰে সেইয়া অৱশ্য়েই হ’ব লক্ষ্যণীয় ।
লগতে পঢ়ক : চৰকাৰৰ বিৰুদ্ধে অধিক সোচ্চাৰ আদিবাসী ছাত্ৰ সন্থা
