উত্তৰ অভয়াপুৰী, 3 ছেপ্টেম্বৰ : বঙাইগাঁও জিলাৰ বিজনী ৰাজহ চক্ৰৰ অন্তগৰ্ত পূৱ গোঁসাইগাঁৱত দুলনী নৈৰ ভয়ংকৰ গৰাখহনীয়া অব্যাহত আছে । প্ৰতিদিনে নৈৰ বুকুত বিলীন হৈছে সেউজীয়া কৃষিভূমি । ইতিমধ্যে, খহনীয়াৰ কবলত পৰিছে কোটি টকীয়া জলসিঞ্চন প্ৰকল্প । জলসিঞ্চন প্ৰকল্পটোৰ আধা অংশ ভাঙি নৈৰ বুকুত জাহ গৈছে । তৎসত্বেও জলসম্পদ বিভাগে কোনো ধৰণৰ গুৰুত্ব প্ৰদান নকৰাৰ অভিযোগ উত্থাপন হৈছে ।
বৃহস্পতিবাৰে আমছুৰ দক্ষিণ বিজনী আঞ্চলিক সমিতিৰ উদ্যোগত দুলনী নৈৰ খহনীয়া প্ৰতিৰোধৰ দাবীত প্ৰতিবাদী কাৰ্যসূচী ৰূপায়ন কৰা হয় । প্ৰতিবাদকাৰী সকলে অসম চৰকাৰ হায় হায়, জলসম্পদ বিভাগ হায় হায়, গৰাখহনীয়া প্ৰতিৰোধৰ ব্যৱস্থা কৰক আদি শ্ল'গান দি পৰিৱেশ উত্তাল কৰি তোলে ৷ অনতিপলমে খহনীয়া প্ৰতিৰোধৰ ব্যৱস্থা নকৰিলে আন্দোলন তীব্ৰতৰ কৰাৰ হুংকাৰ দিছে প্ৰতিবাদকাৰীসকলে ৷
লগতে পঢ়ক : শিল্পকৰ্মৰে জীৱনৰ পথ প্ৰশস্ত কৰি তোলা হোজাইৰ মৃদুল বৰা
