জনীয়া, 7 নৱেম্বৰ : ৰাজ্যত অভাৱনীয় হাৰত বৃদ্ধি পাইছে সামগ্ৰীৰ মূল্য ৷ নিত্য ব্যৱহাৰ্য সামগ্ৰীৰ আকাশলংঘী মূল্যবৃদ্ধিয়ে ৰাম টাঙোন সোধাইছে সৰ্ব-সাধাৰণ ৰাইজক ৷ বিপাঙত পৰিছে ৰাইজ ৷
ৰাজ্যৰ ভিন্ন প্ৰান্তৰ লেখীয়াকৈ কলগাছিয়াৰ পাচলি বজাৰতো লাগিছে জুই ৷ বজাৰলৈ আহি খালী মোনা লৈয়ে ঘূৰি যাবলৈ বাধ্য হৈছে একাংশ গ্ৰাহক ৷ কিন্তু ৰাইজৰ এই সমূহ সমস্যাৰ বুজ লব’লৈ আহৰি নাই ৰাজ্য চৰকাৰৰ ৷ মূল্যবৃদ্ধি ৰোধ কৰাত যেন ব্যৰ্থ হৈছে ৰাজ্য চৰকাৰৰ যোগান বিভাগ ৷ এই অভিযোগ তৰিছে কলগাছিয়াৰ ভুক্তভোগী ৰাইজে ৷
লগতে পঢ়ক : নিজকে জয়াললিতাৰ কন্যা বুলি দাবী কৰিলে এইগৰাকী মহিলাই !
ইফালে মূল্যবৃদ্ধিৰ বাবে বজাৰতো নাটনি হৈছে সামগ্ৰীৰ ৷ কলগাছিয়াৰ বজাৰত পাচলিৰ নাটনি দেখুৱাই একাংশ মধ্যভোগীয়ে শাক-পাচলি মজুত কৰি চৰা দামত বিক্ৰী কৰিছে বজাৰত । আনহাতে, আন একাংশ বেপাৰীয়ে সাৰৰ দাম বেছি হোৱাৰ বাবেই পাচলিৰ মূল্যবৃদ্ধি হোৱাৰ অভিযোগ উত্থাপন কৰিছে ৷
যাৰ ফলত একাংশ ব্যৱসায়ীয়ে অত্যাধিক হাৰত সামগ্ৰী বিক্ৰী কৰাত পানীত হাঁহ নচৰা অৱস্থা হৈছে ৰাইজৰ ৷ একাংশ মধ্যভোগী দালালৰ অতপালিয়ে মূল্যবৃদ্ধিৰ জুইকুৰাত ঘিউহে ঢলাৰ উপক্ৰম হৈছে ৷ দালাল স্বৰূপ একাংশ মধ্যভোগীক নাকী লগোৱাৰ লগতে এই ক্ষেত্ৰত যোগান বিভাগক কঠোৰ দৃষ্টি নিক্ষেপ কৰিবলৈ দাবী জনাইছে ভুক্তভোগী ৰাইজে ৷ এই ক্ষেত্ৰত ৰাজ্য চৰকাৰে কি ব্যৱস্থা গ্ৰহণ কৰে, সেয়াহে হ’ব লক্ষণীয় ৷
লগতে পঢ়ক : দীপাৱলীত মহানগৰীৰ বিভিন্ন স্থানত অগ্নিকাণ্ড সংঘটিত
