পাঠশালাত দুৰ্ধৰ্ষ চোৰ কৰায়ত্বঃ উদ্ধাৰ গাড়ীৰ বেটাৰী

পাঠশালাত বেটাৰী চুৰি কৰি নি থকা অৱস্থাতে আৰক্ষীৰ জালত পৰিল দুধৰ্ষ বেটাৰী চুৰ তপচৰ আলী ৷ আৰক্ষীৰ নিদ্ৰাহৰণ কৰি কেবাখনো গাড়ীৰ বেটাৰী চুৰি কৰিছিল চোৰটোৱে ৷ অৱশেষত পাঠশালা আৰক্ষীয়ে আটক কৰে চোৰটোক ৷

১৭ জুন,পাঠশালা: বৰপেটা জিলাৰ বিভিন্ন প্ৰান্তত দীৰ্ঘদিন ধৰি ডাম্পাৰকে ধৰি বিভিন্ন গাড়ী আৰু মবাইল টাৱাৰৰ পৰা বেটাৰী চুৰি হৈ থকাৰ পিছত দেওবাৰে নিশা পাঠশালা আৰক্ষীৰ জালত পৰিল এটা চোৰৰ দল ৷ দেওবাৰে নিশা পাঠশালা নগৰৰ অঞ্চলী ৰোডত পাঠশালা আৰক্ষী চকীৰ তহলদাৰী আৰক্ষীৰ এটা দলে AS01-AK-0017 নম্বৰৰ এখন ইণ্ডিকা বাহনত সন্দেহবশত তালাচী চলোৱাত গাড়ীৰ ভিতৰত দুটাকৈ চুৰি বেটাৰীসহ চুৰি কাৰ্যত ব্যবহৃত বিভিন্ন সামগ্ৰী উদ্ধাৰ কৰে আৰক্ষীয়ে ৷

আনহাতে তালাচীৰ সময়ত বাঘবৰৰ তপচৰ আলী নামৰ যুৱকজনক আৰক্ষীয়ে আটক কৰে যদিও তপচৰৰ লগত থকা আন এজন যুৱক পলাই যাবলৈ সক্ষম হয়৷ ইয়াৰ পিচতে সোমবাৰে পাঠশালা আৰক্ষীয়ে প্ৰাথমিক তদন্তৰ পিচত এই বেটাৰীকেইটা হাউলী থানাৰ কালঝাৰৰ AS-15AC-2356 নম্বৰৰ ডাম্পাৰখনৰ পৰা চুৰি কৰা বুলি জানিব পাৰে ৷ বৰপেটা জিলাত বেটাৰী চুৰিৰ ঘটনাই সকলোৰে নিদ্ৰাহৰণ কৰাৰ সময়ত সোমবাৰে পাঠশালা আৰক্ষীৰ হাতত কৰায়ত্ব হোৱা তপচৰ আলীয়ে স্বীকাৰ কৰে বেটাৰী চুৰিৰ কথা ৷