জনিয়া,8 জানুৱাৰী : বৰপেটাৰ কলগাছিয়াত বৃহস্পতিবাৰে চানমামা আদৰ্শ চিকিৎসালয় পৰিদৰ্শন কৰে বিধায়ক ড৹ হাফিজ ৰফিকুল ইছলামে ৷ 2014 চনতে স্থাপন কৰা তিনিমহলীয়া এই চিকিৎসালয়খনৰ কেৱল অট্টালিকাটো নিৰ্মাণ কৰিয়েই দায়িত্ব সামৰিছে স্বাস্থ্য বিভাগে ৷
ইয়াৰ পৰিপ্ৰেক্ষিতত 7 বছৰে পৰ্যাপ্ত নাৰ্চ, চিকিৎসকৰ অভাৱত যমৰ যাতনা ভূগিছে ৰোগী আৰু স্থানীয় ৰাইজে । বৰ্তমানো ৰাজ্যিক চিকিৎসালয়ৰ কৰ্মচাৰীৰেই চলি আছে চিকিসালয়খনৰ চিকিৎসা ব্যৱস্থা ।
প্ৰতিদিনে হাজাৰোধিক ৰোগীয়ে চিকিৎসা সেৱাৰ বাবে চিকিৎসালয়খনলৈ যায় যদিও নাপায় পৰ্যাপ্ত পৰিমাণে চিকিৎসা । চৰকাৰে কেৱল আদৰ্শ বিল্ডিং বনায়েই দায়িত্ব সামৰিছে ৷ চিকিৎসাৰ নামত কোনো আদৰ্শ নাই বুলি চিকিৎসালয় পৰিদৰ্শন কৰি এই কথা উল্লেখ কৰে বিধায়ক ড৹ হাফিজ ৰফিকুল ইছলামে ।
চিকিৎসালয়খনত মাত্ৰ এজন চিকিৎসক, দুজন ফাৰ্মাচিষ্ট থকাৰ লগতে বিদ্যুৎ অবিহনে গোহালি সদৃশ কদৰ্যময় পৰিৱেশে বিৰাজ কৰিছে । শীঘ্ৰেই এই আদৰ্শ চিকিৎসালয়খন পৰিদৰ্শন কৰি চিকিৎসালয়খনত পৰ্যাপ্ত পৰিমাণৰ চিকিৎসকক নিযুক্তি দিবলৈ স্বাস্থ্য বিভাগক দাবী জনায় বিধায়ক গৰাকীয়ে ৷
লগতে পঢ়ক : ‘কা’ৰ বিৰোধিতা কৰা বিদ্যাসাগৰৰ এইবাৰ ওলোটা খৰ !
